Норуоттан тахсыбыт талааннаах, кулуубу иккис дьиэ оҥостубут дьон бүгүн култуура үлэһиттэрин кытта тэҥҥэ Култуура күнүн бэлиэтииллэр.
edersaas.ru
Педагогическай үлэ бэтэрээнэ Серафим Федоров Суотту нэһилиэгин төрүт олохтооҕо. Кини оскуола сааһыттан араас театрализованнай дьүһүйүүлэргэ, испэктээкиллэргэ, улахан дьону кытта бииргэ араас куонкурустарга кыттара. 70-с сыллар саҥаларыгар Дьокуускайдааҕы педучище физкультураҕа салаатыгар үөрэнэ сылдьан Л.Л.Сергучев салайар драмкуруһуогар дьарыктаммыта.
1973-1978 сылларга Өймөкөөн улууһун Төрүт нэһилиэгэр физкультура учууталынан үлэлээбитэ. Эдэр учуутал кэнсиэрдэргэ, олохтоох дьон туруорар испэктээктэригэр сүрүн оруоллары оонньуура.
1978-2004 сылларга Серафим Данилович Суоттутааҕы профтехучилищеҕа үлэлээбитэ. «Мичээр» култуурунай киин уус-уран салайааччыта Устинья Борисова норуоттан тахсыбыт талаан туһунан бу курдук кэпсиир:
— Саамай айымньылаахтык үлэлиир кэмигэр төрөөбүт Суоттутун култуурунай киинигэр төһөлөөх үгүс испэктээккэ, кэнсиэргэ, сценкаларга кыттыбытын киһи ааҕан сиппэт. Ол да иһин, биир дойдулаахтара Суоттутааҕы В.П.Свинобоев аатынан норуодунай тыйаатыр артыыһа Серафим Федоров кыттар испэктээктэригэр анаан оҥостон көрө кэлэллэр. Кини оруолларын кыайа-хото тутар норуоттан тахсыбыт дьиҥнээх талаан.
Норуот сөбүлүүр артыыһын сүрүн оруоллара: Д.К. Сивцев-Суорун Омоллоон «Күкүр Ууһуттан» — «Түптүр Хара, «Айаалыттан» — «Айыы сиэнмонологтара. Ону тэҥэ Иван Гоголев-Кындыл, Семен Ермолаев- Сиэн Өкөр, Реас Кулаковскай айымньыларыгар кылаабынай оруоллары толорбута. Суоттутааҕы народнай тыйаатыр биир баар суох артыыһа буоларын бһыытынан биһиги Серафим Федоровы Тыйаатыр сылыгар анаммыт уопсастыбаннай норуот билиниитин «Култуура албан аата» куонкуруска «Тыа сирин киэн туттуута» диэн номинацияҕа кыттарыгар мэктиэлээбиппит.
Серафим Федоров улууһун култуурата сайдыытыгар ис сүрэҕиттэн кыһаллар. Кини «Уус Алдан култууратын сайдыытыгар кылаатын иһин» бэлиэнэн, Ил Түмэн Бочуотунай кыраамататынан наҕараадаламмыта, — диэн кэпсиир
Оттон норуот билиниитин куонкуруһугар кыттар Серафим Федоров Өймөкөөн улууһун Төрүтүгэр 1973-1978 сылларга үөрэппит оҕолоро бу күннэргэ биир дойдулаахтарыгар, үөлээннээхтэригэр туһаайан:
— Үгүс спортсмен ыччаты иитэн таһаарбыт, биһиги көлүөнэ кумир-учууталбыт, билигин төһө да бочуоттаах сынньалаҥҥа олордор, Суоттутааҕы тыйаатырга артыыстыыр айар куттаах Серафим Даниловичпытыгар куоласкытын биэрэн өйүүргүтүгэр көрдөһөбүт. «Сааһырдым» диэн дьиэтигэр бүгэн олорбокко, 70 саастаах Учууталбыт олох үөһүгэр сылдьарыттан, кини курдук олоххо тардыһыылаах санаалаах дьон олоҕу истиҥник таптыыр ытык киһиэхэ, култуура бэтэрээнигэр хото куоластыаҕыҥ! — диэн батсаапка ыҥырыы таһаардылар.
Өймөкөөн улууһун Төрүтүгэр учууталынан үлэлии сылдьан уонна күн бүгүнүгэр диэри төрөөбүт Уус Алданын Суоттутугар олорон уус-уран самодеятельноһы, чуолаан тыйаатыры өрө туппут, олоҕун суолдьутунан оҥостубут сцена бэтэрээнэ Серафим Федоров күн бүгүҥҥэ диэри сценаттан түспэт.
Сцена бэтэрээнэ үлэлээбит Төрүтүн уонна дойдутун Суотту дьоно-сэргэтэ Тыйаатыр сылынан уонна Култуура үлэһиттэрин күнүнэн: «Өрүү бүгүҥҥүҥ курдук дьонуҥ-сэргэҥ ортотугар сылдьан, кулууп сценатыттан түспэккэ көрөөччү махталлаах ытыһын тыаһыгар бигэнэн олор дуу, Серафим Данилович!» — диэн истиҥ эҕэрдэлэрин тиэрдэллэр.
Елена ПОТОЦКАЯ, «Саха сирэ» хаһыат, edersaas.ru
Хаартыска Суоттутааҕы В.П. Свинобоев аатынан народнай тыйаатыр архыыбыттан.