Сэбиэскэй былаас саҕана сэтинньи 7-гэр дойду олоҕун тосту уларыппыт Улуу Өктөөп өрөбөлүүссүйэтин күнүн өрө көтөҕүллэн туран байыаннай параадынан ньиргиччи бэлиэтиир этилэр. Ол эрэн, ССРС ыһыллыаҕыттан бырааһынньык эмиэ умнуллан, уота-күөһэ уостан, өҥө-дьүһүнэ өлбөөрөн барбыта.
Үгүс дьон устуоруйаҕа хаалбыт бырааһынньыгы Сомоҕолоһуу күнүнэн солбуйдулар дииллэр.
edersaas.ru
Сахабыт сиригэр биллэр-көстөр дьон бу бырааһынньык устуоруйатын туһунан тугу билэллэрий, өрөспүүбүлүкэҕэ төһө наадалаах дии саныылларый уонна дьиэлэригэр бэлиэтииллэр дуо, диэн ыйытыкка эппиэттииллэригэр көрдөстүм.
Майя Данилова, СӨ экономикатын миниистирэ:
— Сэтинньи 4-гэр норуот сомоҕолоһуутун күнүн Арассыыйаҕа 2005 с. бэлиэтиибит. Ол эрэн, биһиги ортобутугар баар дьон сэтинньи 7 күнүгэр бары күргүөмүнэн параакка тахсалларын өйдүүллэр. Күн бүгүн биһиги оҕолорбутун саҥа бырааһынньык тыыныгар иитэбит, өрөбүлгэ бары дьиэ кэргэнинэн мустарбытын сөбүлүүбүт.
Анжелика Андреева, СӨ Дьахталларын тэрилтэлэрин сойууһун бэрэссэдээтэлэ:
— Бу саҥа төрүттэммит бырааһынньык дьиҥ устуоруйата Минин уонна Пожарскай Москваны босхолообут бэлиэ күннэрин кытта ситимнээх. Сүрүн ис хоһооно Арассыыйа курдук аан дойдуга саамай улахан дойду араас норуоттарын сомоҕолооһун. Дойдубут сайдарын туһугар сырдык санаалаах уопсай сыал-сорук туһугар дьону түмээһин.
Биһиги уопсастыбаннай түмсүүгэ үлэлиирбит быһыытынан, оскуола оҕолорун кытта көрсөн уонна сонуну киэҥник тарҕатар ситим нөҥүө бырааһынньык суолтатын кэпсиибит, сырдатабыт.
Оттон аҕа саастаах көлүөнэ өйүттэн-санаатыттан сэтинньи 7 күнүгэр кыһыл былаах тэлибириир параада умнулла илик, норуот сомоҕолоһуутун күнүн оннук истиҥник ылыналларыгар бириэмэ наада.
Саха сирэ Арассыыйа сорҕото буолар, ол курдук бары бэлитиичэскэй баартыйалар мустан, ити күн миитин ыыталлар.
Оскуолаҕа үөрэнэр уолум биирдэ бу туох бырааһынньыгай диэн ыйыталаспыта, ону аҕабыт барытын быһааран биэрбитэ. Онон Сомоҕолоһуу күнүн оҕолор билэллэр.
Наталья Михалева-Сайа, бэйиэт, суруйааччы:
— Арассыыйаҕа саҥа тутул, саҥа былаас кэллэ да уруккуну урусхаллааһын, бүтүн дойду олоҕун уларыппыт күнү-дьылы кытта бар дьон өйүттэн сото, атынынан солбуйа сатааһын баар. Уруккутун өйдөөбөт норуот сырыы ахсын биир алҕаһы хатылыы туруо суоҕа дуо? Сэтинньи 4 күнүнээҕи бырааһынньык ис хоһоонун хас эмэ үйэ тухары эмиэ умуннаран сылдьан баран билигин күөрэтэн таһаарбыттарын дьон сүрэҕинэн-быарынан ылыммат. Көлүөнэттэн көлүөнэҕэ бэриллэн испэтэх, ол иһин. Дьиҥэ, сэтинньи 7 күнэ үчүгэйдээҕин да, куһаҕаннааҕын да иһин устуоруйабытыгар улахан суолталаах, кэлэр сүһүөх дьоҥҥо үөрүйэх буолар күн этэ. Бэлиэтэммэтэҕин да иһин, халандаарга бигэтик хаалыахтаах. Саҥа бырааһынньыгы эбии өрөбүл күн баар буолбутун эрэ курдук ылынабын, бэлиэтээбэппин.
Николай Находкин, СӨ Быыһыыр сулууспатын начаалынньыга:
— Разделяй и властвуй диэн нуучча өс хоһооно баар. ССРС ыһыллыбытын кэннэ аны Арассыыйаны ыһыахтарын, кыра судаарыстыбаларга бытарытыахтарын, күүһүн өһүлүөхтэрин баҕараллар. Ыраата барбакка биһиги сахалар даҕаны улуустарынан хайдыһабыт. Итинник күөртээһиҥҥэ, утарыта туруортааһыҥҥа киирэн биэримиэххэ наада. Биир норуот, биир судаарыстыба хаһан баҕарар күүстээх буолар. Ону түмэ тардар, норуоту сомоҕолуур тэрээһин баара үчүгэй. Биһиги көлүөнэ Өктөөп өрөбөлүүссүйэтин сэтинньи 7 күнүгэр бэлиэтии үөрэммиппит, ону саҥа бырааһынньыгынан солбуйдулар эрээри, дьиэбитигэр ону бэлиэтээбэппит.
Марианна ТЫРТЫКОВА, «Саха сирэ» хаһыат, edersaas.ru