Бу күннэргэ Арассыыйа Наукаларын академиятын Сибиирдээҕи салаатын Саха сиринээҕи научнай киинигэр Айсен Николаевы өйүүр уопсастыбаннай хамсааһын приемнайыгар үгүс киһи сылдьар.
edersaas.ru
Мин манна киһини көрсөөрү, уопсастыбаннай приемнай үлэтин сүрүннээччилэртэн биирдэстэрэ Афанасий Ноев Дьааҥы Табалааҕын олохтооҕо Николай Клепандины кытта суолталаах боппуруоһу быһаарса олороругар түбэстим.
Кэпсэтэриттэн-ипсэтэриттэн, туттарыттан-хаптарыттан сылыктаатахха, ытык кырдьаҕас салайар үлэҕэ уопуттаах, дуоспуруннаах тыллаах-өстөөх, олох үөһүгэр сылдьар киһи. 76 саастаах Николай Семенович доруобуйата мөлтөөн, өрөспүүбүлүкэтээҕи Мэдиссиинэ киинигэр көрдөрө сылдьар эбит. Хоту сир олохтооҕо Саха араадьыйатын истибэккэ, олохтон хаалан олороллорун туһунан кэпсээтэ:
— Булчуттар, табаһыттар, геологтар, туристар араадьыйаны тыаҕа илдьэ сылдьар буолан олус абыранар этибит. Ол эрээри быйыл ыам ыйын 1 күнүттэн араадьыйа биэриилэрэ быстан хаалбыттара. Биллэн турар, араадьыйа передатчигын сыаната олус ыарахан. Ол иһин уопсастыбаннай приемнайга кэлэн, аҕыйах ахсааннаах хотугу норуоттарга — табаһыттарга уонна булчуттарга, ону тэҥэ геологтарга олус наадалаах араадьыйа боппуруоһун быһаартаараары санаабын тиэртим. Хас биирдии боппуруоһу суругунан ылаллар эбит. Онон баҕа санаабын докумуоҥҥа тиһэн киллэрбиппин биир бэйэм олус астынан олоробун. Бу маннык приемнайдар биһиэхэ, ыраахтан сылдьар тыа сирин дьонугар, олус наадалар. Онон доруобуйабын көрдөрүүм таһынан, хотугу улуустар сытыы кыһалҕаларын эмиэ туруорсан, сорукпун толору ситэн баран эрэрбиттэн олус үөрэбин.
«Норуот приемнайын» сүрүннээччи Афанасий Ноев бэлиэтииринэн, манна улуустар землячестволарын, национальнай общиналар, араас уопсастыбаннай түмсүүлэр бэрэстэбиитэллэрэ дьону түмэр соруктаах үлэлииллэр.
— Ыраах Дьааҥыттан кэлбит Николай Клепандин тыаҕа сылдьар дьон Саха араадьыйатын истибэккэ олороллорун туһунан иһитиннэрэн, өрөспүүбүлүкэ хотугу улуустарын олохтоохторун өссө биир сытыы боппуруоһун таарыйда. Онон дьон кыһалҕатын «Норуот приемнайыгар» анаан кэлэн этинэрэ хайҕаллаах суол. Ыраах улуустартан кэлбит дьон: «Санаа оҥосто сылдьар боппуруостарбытын этинэр, быһаарсар сирдээхпит баара олус үчүгэй эбит. Кытаатыҥ, тахсыылаахтык үлэлээҥ, дьон санаатын Ил Дархан дуоһунаһыгар турбут хандьыдаакка тиэрдиҥ», — диэн махтанан тахсаллара биһиги үлэбитин-хамнаспытын «кымньыылыыр» уонна эппиэтинэстээх буолууну ирдиир, — диэн бэлиэтиир Афанасий Ноев.
От ыйын ыйын 4 күнүттэн бүгүҥҥү күҥҥэ диэри 80-ча киһи кэлэн, араас боппуруоска санаатын атастаста, этии киллэрдэ. «Норуот приемнайа» аана сабыллыбат, араас боппуруостаах дьон манна кэлэн санаатын, сонунун үллэстэн, сэһэргэһэн, сонун ис хоһоонноох, кэскиллээх хайысхалаах торумнары суругунан киллэрэн барар.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ.