Дьокуускайга Айсен Николаевы өйүүр «Норуот приемнайа» аһылынна

От ыйын ыйын 6 күнүттэн, бээтинсэттэн, Арассыыйа Наукаларын академиятын Сибиирдээҕи салаатын Саха сиринээҕи научнай киинин 120 №-дээх хоһугар Ил Дархан быыбарыгар Айсен Николаевы өйүүр “Норуот приемнайа” аһылынна.

edersaas.ru

Ил Дархан эбээһинэһин быстах кэмҥэ толорооччу Айсен Николаев үрдүкү дуоһунаска — “Биир ньыгыл Россия” баартыйаттан хандьыдаат. Кинини киин куоракка олорор Саха сирин улуустарын түмсүүлэрэ өрөспүүбүлүкэ билиҥҥи лиидэрин быһыытынан көрөн, бэйэлэрин эрэллэрин биллэрбиттэрэ. Бэс ыйын 29 күнүгэр буолбут мунньахха Саха сирин улуустарыттан төрүттээхтэри, араас омуктар общиналарын уонна уопсастыбаннай түмсүүлэри түмэр, сомоҕолуур “Айсен Николаевы өйүөххэ!” диэн норуот хамсааһына үөскээбитэ.  Бу хамсааһыны “Таатта түмсүү” көҕүлээбитэ.

— Биһигини өрөспүүбүлүкэ бары улуустарыгар өйөөтүлэр. Бүгүҥҥү күҥҥэ хотугу улуустар бэрэстэбиитэллэрэ, национальнай общиналар, биир дойдулаахтар түмсүүлэрэ, култуура диэйэтэллэрэ уонна спортивнай уопсастыбалар түмсүүлэрэ, быһата, өрөспүүбүлүкэ уопсастыбаннаһа Айсен Николаев тула түмүстэ, — диэн бэлиэтиир Тааттаттан төрүттээх биир дойдулаахтар түмсүүлэрин салайааччы Владимир Аржаков.

— Саха сиринээҕи научнай киин 120 №-дээх хоһугар үлэ күннэригэр сарсыарда 9 чаастан киэһэ 18 чааска, өрөбүл кэмигэр сарсыарда 10 чаастан киэһэ 17 чааска диэри «Норуот приемнайа» Айсен Николаевка туһаайыллыбыт дьон—сэргэ, араас хайысхалаах холбоһуктар этиилэрин, санааларын, туруорсууларын түмүөҕэ. Манна улуустар түмсүүлэрин, национальнай общиналар уонна уопсастыбаннай тэрилтэлэр волонтердара дьуһуурустуба бэрээдэгинэн үлэлиэхтэрэ, — диэн эттэ уопсастыбанньыктар хамсааһыннарын чэрчитинэн тэриллибит «Норуот приемнайын» аһар үөрүүлээх түгэҥҥэ уопсастыбанньыктары сүрүннээччи Афанасий Ноев.

“Айсен Николаевы өйүөххэ!” норуот хамсааһынын лиидэрдэригэр дьону түмэр соруктаах үлэлииргэ “итэҕэл мандаатын” туттардылар.

Бастакынан бу уопсастыбаннай докумуону Саха сирин чукчаларын ассоциациятын бэрэстэбиитэлэ Жанна Дьячкова тутта.

— Ил Дархан э.т. Айсен Николаев халаан содулуттан эмсэҕэлээбит Аллараа Халыма улууһугар кэлэ сылдьан дьон санаатын көтөхпүтүгэр, суолталаах дьаһаллары ылбытыгар биир дойдулаахтарым олуһун махтаналлар. Онон балаҕан ыйыгар буолар быыбарга халымалар Айсен Николаевка куоластарын биэрэллэригэр эрэллээхпин, — диэн култуура туйгуна санаатын тиэртэ.

Онон ким туох этиилээх, санаалаах Дьокуускай куоракка Саха сиринээҕи научнай кииҥҥэ (Опера уонна балет тыйаатырын утары) 120 №-дээх хоско үлэ күннэригэр: сарсыарда 9 чаастан киэһэ 18 чааска, өрөбүл күн: сарсыарда 10 чаастан киэһэ 17 чааска диэри кэлэн билсиэххитин сөп.

Елена ПОТОЦКАЯ, “Саха сирэ” хаһыат, edersaas.ru

Хаартыскаҕа Андрей Сорокин түһэриитэ.