“Биир ньыгыл Арассыыйа” «Erudit.Media» порталыгар барыллаан куоластааһыҥҥа анаммыт пресс-ыйытык ыытта. Онно биэс тыһыынчаттан тахса киһи кыттан, санаатын эттэ.
Роман Попов, “Саха сирэ” хаһыат, edersaas.ru
Ыйытыкка хоруйдаабыттар 51,2 бырыһыаннара быыбар иннинэ бары баартыйалар бэйэлэрин барыллаан куоластааһыннарын ыыталлара сөбүн, бу бастыҥтан бастыҥнары сүүмэрдээһиҥҥэ көдьүүстээх ньыма буоларын эттэ.
Кинилэртэн 37 бырыһыаннара барыллаан куоластааһыны бары баартыйалар хайаан да ыытыахтаахтар диэн санааны тутуһар. Арай 3,2 бырыһыаннара барыллаан куоластааһын диэн тугун билбэппит диэн билиннэ. Үгүстэр праймериз күрэстэһиини үөскэтэр, чулуулары таларга кыаҕы биэрэр диэн санаалаахтар. Ыйытыгынан хабыллыбыттар түөрт гыммыт биирдэрэ регион тирээн турар кыһалҕаларын барыллаан куоластааһын кэмигэр эрэ билэбит диэн хоруйдаата. 17 бырыһыаннара праймериз кэмигэр хандьыдааты кытта көрсүһүүгэ бэйэлэрин санааларын былааска тиэрдэр кыах бэриллэрин бэлиэтээбит.
Ыйытыкка эпиэттээбиттэртэн 3,5 тыһыынча киһи үөрэхтээһин хаачыстыбата, ОДьКХ, олорор дьиэ, доруобуйа харыстабылын боппуруостара праймериз дебаттарын сүрүн тиэмэлэринэн буолуохтаахтар диэбит.
Санатар буоллахха, “Биир ньыгыл Арассыыйа” баартыйа ыытар барыллаан куоластааһыныгар кыттыан баҕалаахтартан сайаапкалары муус устар 27 күнүгэр диэри ылаллар. Онно туох докумуон ирдэнэрин pg.er.ru сайтка киирэн сиһилии билсиэххэ сөп. Быыбардара балаҕан ыйын 10 күнүгэр буолар регионнарга, “ньыгыллар” барыллаан куоластааһыннара ыам ыйын 28 күнүгэр ыытыллар. “Биир ньыгыл Арассыыйа” билиҥҥитэ дойдуга барыллаан куоластааһыны ыытар соҕотох баартыйанан буолар.
Роман Попов, “Саха сирэ” хаһыат, edersaas.ru