Норуот маастардарын уонна уран тарбахтаахтарын өйүүр инниттэн 2012 сылтан өрөспүүбүлүкэҕэ Норуот маастарын күнэ тохсус сылын бэлиэтэнэр.
Быйыл тэрээһин сыстыганнаах ыарыынан сибээстээн, сүрүннээн куйаар ситиминэн ыытыллыаҕа.
Былырыыҥҥа диэри өрөспүүбүлүкэ бары улуустарыттан норуот маастардара киин куоракка түмсэллэрэ.
Норуот маастарын күнэ саха дьонугар саамай сөбүлүүр бырааһынньыктарынан буолбута.
Быйыл норуот маастарын күнүн тэрээһиннэрэ кулун тутар 3 күнүгэр ыытыллар “Норуот маастардарын үлэлэрин сайдыытын саҕахтара” аһаҕас кэпсэтии өрөспүүбүлүкэ улуустарын бэрэстэбиитэллэрэ кыттыылаах ZOOM пуорматынан куйаар ситиминэн саҕаланыаҕа. Салгыы күн аайы норуот маастардарын хамсааһыннара сайдыытыгар туһаайыллыбыт дьыалабыай кэпсэтиилэр анал быраагыраама чэрчитинэн ыытыллыахтара. «СахаБулт» ҮАПК бэйэтин оҥоһуктарын билиһиннэриэҕэ.
Кулун тутар 5 күнүгэр Өксөкүлээх Өлөксөй аатынан Норуоттар доҕордоһууларын дьиэтигэр «Якутия мастеровая» айар быыстапка ХI төгүлүн ыытыллыаҕа.
Манна айар үлэ, норуот маастардарын оҥоһуктарын интэриэһиргээччилэр кэлэн билсиэхтэрин, көрүөхтэрин-истиэхтэрин сөп. «Өбүгэ иhитэ» туой иһити оҥорооччулар, «Дьабака» бэргэһэни тигээччилэр күөн-күрэстэрэ ыытыллыаҕа.
Маны таһынан, «Симэх» национальнай киин саҥардыллыбыт саайтын билиһиннэрии буолуоҕа. «Уруйдан, Уус күнэ!» үөрүүлээх киэһэ норуот талааннаахтарын түмүөҕэ. Быһа эпиир @simekhsakha инстаграм сирэйигэр ыытыллыаҕа.
Бу күннэргэ улуустарга норуот маастардарын сэлэлээн хаамыылара буола турар.
Бу тэрээһиннэр Өксөкүлээх Өлөксөй аатынан Норуоттар доҕордоһууларын дьиэтигэр тэрээһин ыытыллар күннэрин устата куйаар ситиминэн көстүөҕэ.
Елена ПОТОЦКАЯ, “Саха сирэ” хаһыат, edersaas.ru
Хаартыска: Ааптар түһэриитэ уонна Норуот оҥоһугун «Симэх» Национальнай киинин дириэктэрэ Яна Игнатьева тиксэриитэ.