Бүгүн, кулун тутар 5 күнүгэр, Саха сиригэр Норуот маастарын күнэ бэлиэтэнэр. Өксөкүлээх Өлөксөй аатынан Норуоттар доҕордоһууларын дьиэтигэр бу бэлиэ күн үөрүүлээхтик аһыллыыта буолла.
Норуоттар доҕордоһууларын дьиэтин генеральнай дириэктэрэ Антонида Корякина: «Төһө да сыстыганнаах дьаҥ бары тэрээһиннэри ыытыыны мэһэйдээтэр, бу күнү норуот маастардара идэлээх бырааһынньыктарын курдук ылынан үөрүүлээхтик бэлиэтииллэр. Ол ону бу күннэргэ өрөспүүбүлүкэ улуустарыгар саха национальнай таҥаһын кэтэн баран, уран тарбахтаахтар сэлэлээн хаамыылара туоһулууллар», — диэн бэлиэтээтэ.
Салгыы салайааччы олох сайдан, норуот маастардара аныгы технологияны хото туһанар буолбуттарын холобурдаата.
Оттон «Симэх» галерея салайааччыта Яна Игнатьева өрөспүүбүлүкэҕэ 500-тэн тахса уус-уран оҥоһугу оҥоруунан дьарыктанар маастар, 200-тэн тахса норуот маастара ситиһиилээхтик айа-тута сылдьалларын бэлиэтээтэ. Кини үгүс айар куттаах дьон саха норуота өбүгэ саҕаттан илдьэ кэлбит үгэстэрин сайыннаран, бэйэлэрин үлэлэрин омук сиригэр тиийэ билиһиннэрэллэрин, ыччаты бэйэлэрин сатабылларыгар уһуйалларын бэлиэтээтэ. Яна Викторовна быйыл Норуот маастарын күнэ 9-с, «Якутия мастеровая» быыстапка 11-с төгүлүн ыытылларын бэлиэтээн туран, сыл аайы маастардар оҥоһуктарын хаачыстыбата тупсан, ис хоһооно дириҥээн иһэриттэн үөрэрин уонна киэн туттарын биллэрдэ.
Норуот маастардарын үөрүүлээх тэрээһинин дьоро күнүн бэлиэтээһин бу чааска Өксөкүлээх Өлөксөй аатынан Норуоттар доҕордоһууларын дьиэтигэр буола турар. Манна норуот маастардарыгар анал ааттары иҥэриэхтэрэ, бастыҥнары чиэстиэхтэрэ, өрөспүүбүлүкэ биллиилээх артыыстара эҕэрдэ кэнсиэрэ буолуоҕа.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскалара