«Саха сирин киэн туттуута» бириэмийэ «Норуот маастара» номинациятыгар финалистары талыы түмүктэннэ.
edersaas.ru
Куоластааһыҥҥа бастаан, ФИНАЛИСТ үрдүк аатын ылан, инники күөҥҥэ таҕыстылар:
Василена Шарина, Амма улууһуттан бэйэ оҥоһугунан дьарыктанар маастар – 1770 куолас;
Лидия Тимирдяева, Таатта улууһуттан норуот маастара – 1555 куолас;
Мария Захарова, Мииринэй оройуонуттан илиинэн оҥоһук маастара – 1311 куолас;
Николай Степанов, Бүлүү улууһуттан норуот маастара – 1185 куолас;
Татьяна Карамзина — Нам улууһуттан норуот маастара – 1077 куолас.
Хомойуох иһин, бу дьону кытта тилэх баттаһан испит Чурапчы улууһун маастардара Василий Попов уонна Мария Федорова финалистарга хапсыбатылар.
Уон бастыҥнар ахсааннарыгар норуот маастардара Мария Захарова, Саргылана Алексеева, Татьяна Карамзина, Татьяна Карсанаева, Николай Никитин уонна Мария Гаврильева ааттара бааллара. Кинилэртэн Намтан Татьяна Карамзина, Мииринэй оройуонуттан Мария Захарова финалистар ахсааннарыгар киирдилэр. Амматтан Василена Шарина, Тааттаттан Лидия Тимирдяева, Бүлүүттэн Николай Степанов куоластааһыҥҥа иннэлэрин биэрбэккэ, бастыҥнар ахсааннарыгар сылдьаллар.
Бу биэс финалистан БИИР маастар «Норуот маастара» номинацияҕа кыайыылаах тахсыахтаах. Онон, доҕоттор, киирсии өссө тыҥааһыннанна! Кыайыылааҕы быһаарар интернет-куоластааһын ыам ыйын 21 күнүгэр саҕаланар уонна ыам ыйын 25 күнүгэр түмүктэнэр. Куоластааһын саҥаттан ыытыллар, онон финалистар хаттаан куолас хомуйаллар.
«Бастыҥ» номинация иһин куонкурус үлэ түмүгүн таһаарар, талааннары көрдүүр куоластааһын буолбатах. Бу аттыбытыгар үлэлии сылдьар, таптыыр идэлэригэр таба тайаммыт үлэттэн дьоллонор дьону кэмигэр бэлиэтээн көрүү буолар. Кинилэргэ махтал тылларын саамай күөгэйэр күннэригэр сырыттахтарына этэн үөрдүү.
Кытаатыҥ, финалга тахсыбыт бэйэҕит улуустаргыт маастардарын инники күөҥҥэ таһаарарга өйөбүл буолуҥ. Тустаахтарга долгуйуу кэмэ саҕаланна!
Елена ПОТОЦКАЯ, «Саха сирэ» хаһыат, edersaas.ru