Эрдэ иһитиннэрбиппит курдук, бу ый 29-30 күннэригэр Дьокуускайга Саха Өрөспүүбүлүкэтин муниципальнай тэриллиилэрин бэрэстэбиитэллээх уорганнарын дьокутааттарын I сийиэһэ буолар. Бу улахан тэрээһиҥҥэ улуустардааҕы, нэһилиэктэрдээҕи сэбиэттэр 500-тэн тахса дьокутааттара кыттыахтара.
Роман Попов, “Саха сирэ” хаһыат, https://edersaas.ru
Сийиэс үлэтигэр Федерация Сэбиэтин сенатордара, Судаарыстыбаннай Дуума дьокутааттара, регион бырабыыталыстыбаларын чилиэннэрэ, СӨ Конституционнай Суутун судьуйалара, федеральнай, өрөспүүбүлүкэтээҕи ситэриилээх былаас бэрэстэбиитэллэрэ, улуус, куораттааҕы уокурук баһылыктара, Саха сирин муниципальнай тэриллиилэрин сэбиэттэрин, өрөспүүбүлүкэ олохтоох салайыныытын бэрэстэбиитэллээх уорганнарын ассоциациятын бэрэстэбиитэллэрэ, о.д.а. кыттыыны ылыахтара.
Бэҕэһээ Ил Түмэҥҥэ сийиэһи тэрийэн ыытыыга анаммыт мунньахха тэрээһин иитинэн “Муниципальнай тэриллиилэр бэрэстэбиитэллээх уорганнарын дьокутааттарыгар анаан муниципальнай таһымҥа бырайыагынан салайыыны киллэрии туһунан” бырагырааманан идэни үрдэтинэр семинар ыытыллыаҕын иһитиннэрдилэр.
Кулун тутар 29 күнүгэр “Муниципальнай тэриллиилэр бэрэстэбиитэллээх уорганнарын туһунан сокуоннары сайыннарыы кэскиллэрэ, кыһалҕалара” тиэмэҕэ семинар буолуоҕа.
Сийиэс кыттыылаахтара “төгүрүк остуолларга” бэрэстэбиитэллээх уорганнар үлэлэрин-хамнастарын тэрийии сытыы өрүттэригэр, өрөспүүбүлүкэ бэлитиичэскэй, уопсастыбаннай олоҕор эдэр дьокутааттар оруолларыгар, сир сыһыаннаһыыларын боппуруостарыгар, тулалыыр эйгэни харыстааһыҥҥа, баайы-дуолу, үбү көдьүүстээхтик туһаныыга санаа үллэстиэхтэрэ, кэпсэтиэхтэрэ.
Ил Түмэн иһинэн үлэлиир парламентарий-дьахталлар уопсастыбаннай, бэлитиичэскэй кулууптара дьокутаат-дьахталлары “2017-2022 сс. Национальнай стратегия үлэтэ дьахталлар интэриэстэригэр” диэн “төгүрүк остуол” тула мунньуоҕа.
Бу күн улуус дэлэгээссийэлэрэ министиэристибэлэринэн, биэдэмэстибэлэринэн көрсүһүүлэрэ былааннанар.
Саха Өрөспүүбүлүкэтин муниципальнай тэриллиилэрин бэрэстэбиитэллээх уорганнарын дьокутааттарын I сийиэһэ кулун тутар 30 күнүгэр Д.К. Сивцев – Суорун Омоллоон аатынан Опера уонна балет тыйаатырыгар буолуоҕа. Онно мунньах кыттыылаахтара уураах ылыныахтара.
Тэрээһини Саха Өрөспүүбүлүкэтин дьокутааттарын VI спартакиадата түмүктүөҕэ. Онно сүүрбэ хамаанда кыттара күүтүллэр. Улуус, нэһилиэк дьокутааттара буулдьанан ытыыга, остуол тенниһигэр, волейболга, саахымакка күрэс былдьаһыахтара.
Роман Попов, “Саха сирэ” хаһыат, https://edersaas.ru