Уопсастыба

Норуот кинигэтигэр кыттыһыҥ

Улуу Кыайыы 75 сылынан “Өйдүүбүт. Киэн туттабыт. Сүгүрүйэбит” диэн Кыайыы күнүн көрсө бэртээхэй кинигэ таҕыста. Бу – норуот кинигэтэ.  

edersaas.ru

Тоҕо итинник ааттыылларын уонна бу кинигэни оҥоруу олоххо хайдах киирбитин туһунан «Бичик» кинигэ кыһатын генеральнай дириэктэрэ Август Егоров кэпсиир: 

Биһиэхэ Кыайыы күнүн көрсө кинигэ бэчээттэтиэн баҕалаах сыл ахсын элбээн иһэр. Ону учуоттаан, Кыайыы 75, өрөспүүбүлүкэҕэ Дойдуга бэриниилээх буолуу, Арассыыйаҕа Өйдөбүл уонна Албан  Аат сылларынан норуот энциклопедиятын  оҥорорго толкуйдаабыппыт. Итиэннэ Кыайыы 75 сылынан бары көмөлөөн кинигэтэ оҥоруоҕуҥ диэн биллэрии таһаарбыппыт. Бу саҕалааһыммытын дьон-сэргэ олус сэргээтэ, биһирээтэ. Маныаха биир кинигэни таһаартарарга 100-тэн 200 тыһыынчаҕа диэри үп наада буоллаҕына, бу кинигэҕэ 2 тыһыынча солкуобайтан саҕалаан (төһө киһини киллэрэллэриттэн) төлүүллэр уонна кэнчээри ыччаттарыгар үйэлээх өйдөбүнньүгү бэлэх ууналлар.  

Дьон-сэргэ сэрии, тыыл бэтэрээннэрин, сэрии тулаайахтарын, сэрии туох баар иэдээнин, аһыытын-ньулуунун эттэринэн-хааннарынан билбит эбээлэрин, эһээлэрин, урууларын-аймахтарын туһунан суруйан, кинигэҕэ таһаартаран, кэнчээри ыччакка хаалларарга туруннулар, сомоҕолостулар. Бэрт аҕыйах хонук иһигэр 600-тэн тахса матырыйаал киирдэ. Онон, дьэ кырдьык, норуот хамсааһына буолла. 

Түгэнинэн туһанан эттэхпинэ, биһиги ытык кырдьаҕастарбытын, сэрии, тыыл бэтэрээннэрин үйэтитэргэ маннык саҕалаабыппыт атын эрэгийиэннэргэ  суох, Арассыыйаҕа  бастакы холобур буолла.  

Бу күннэргэ кинигэ  күн сирин көрдө. Онон үлэхтээх дьон кинигэни үөрэ-көтө ылан эрэллэр. Маныаха Август Васильевич бу үтүө үгэс салҕанар диэтэ. Ол курдук, билигин иккис туомҥа матырыйаал хомулла сылдьарын, оттон сайаапкалары от ыйын 10 күнүгэр диэри ылалларын эттэ. Былаан быһыытынан, кинигэ иккис туома балаҕан ыйыгар тахсыахтаах. 

Маныаха өрөспүүбүлүкэҕэ киэҥ сэҥээриини ылбыт бырайыак балаһыанньатын кытары «Бичик» кыһа bichik.ru сайтыгар киирэн билсиэххитин, бу үйэлээх, үтүө дьыалаҕа кыттыһыаххытын сөп. 

Сардаана Баснаева, «Саха сирэ» хаһыат, edersaas.ru

Хаартыска «Бичик» кинигэ кыһатыттан

 

0
0

Добавить комментарий