Билигин батсаап ситимигэр «Норуот хапсаҕайын” күрэхтэһиитин туһунан биллэрии тарҕана сылдьар.
Ол курдук, нэһилиэктэр икки ардыларыгар ыытыллар хапсаҕай тэрээһинин ахсынньы 18-19 күннэригэр былаанныыллар. Кыайыылаах хамаанда үгэс быһыытынан супер-бириискэ, «УАЗ» массыынаҕа тиксэр.
“Норуот хапсаҕайа” күрэхтэһии уруккуттан бар дьону түмэр, көҕүлүүр биир сүрүн тэрээһин буолар. Манна 18-39 саастарыгар диэри саастаах эр дьон, ону сэргэ 40-55 саастаах бэтэрээн эр дьон кыттар. Манна ыйааһыҥҥа хааччах суох. Арай QR-куод ирдэнэр уонна маастар нуорматын толорбут киһи кыттара бобуллар. Ону таһынан, успуорт хайысхалаах үөрэххэ үөрэнэр устудьуоннар кыттыбаттар.
Быйыл бу күрэхтэһии чахчы буоларын дуу, буолбатын дуу билээри, ону сэргэ урукку сылларга бу тэрээһин бастайааннай успуонсара Егор Афанасьевич Борисов быйыл бириис туруорарын дуу, суоҕун дуу билээри тэрийээччи Нам улууһун II Хомустаах баһылыгар Лев Николаевич Новгородовка сибээскэ тахсан сурастыбыт:
— Биһиги ыытар тэрээһиммитигэр Егор Афанасьевич хайаан да кыттыһар, успуонсар, өйөбүл да быһыытынан диэн этиэххэ наада. Кинитэ суох бу тэрээһин буолбат. Оттон тэрээһиммит бу суруллубут чыыһылаларга буоларын дуу, буолбатын дуу өрөспүүбүлүкэтээҕи суһал ыстаап быһаарар. Билиҥҥи туругунан көҥүл ыла иликпит. Өрөспүүбүлүкэҕэ коронавирус дьаҥын балаһыанньата хайдах буоларыттан тутулуктаах. Онон көҥүл ыллахпытына биирдэ тэрээһиммитин ыытабыт.
Ульяна ЗАХАРОВА, edersaas.ru