Бүгүн, сэтинньи 19 күнүгэр, норуот дьокутаата, биллэр-көстөр меценат Руслан Федотов уонна Амма улууһун дьокутааттарын Сэбиэтин бэрэссэдээтэлэ Софья Александрова биирдиилээн дьону кытта көрүстүлэр.
Кыһалҕалаах, боппуруостардаах дьон улуус дьаһалтатын дьиэтигэр эрдэттэн суруйтаран кэлэн, дьокутааттары кытта кэпсэттилэр. Уопсайа 12 киһи сырытта. Араас боппуруос киирдэ. Кэтэх олорор дьиэни киин ититэр ситимҥэ холбооһун, Амма 1 №дээх оскуолатын баазатыгар эбии үөрэхтээһини арыйыы, автооскуола мастарыскыайын тутуу, олох уустук түгэннэригэр түбэспит оҕолорго көмө-өйөбүл оҥорор стационары арыйыы, Амма нэһилиэгин түөлбэлэрин сынньалаҥнарын атааралларыгар балаһаакка тутуута, элбэх оҕолоох ыалларга уһаайбаны биэрии уочарата бытааннык сыҕарыйыытын туһунан кэпсэтии буолла.
Руслан Еремеевич, Софья Лаврентьевна дьон этиилэрин болҕомтоҕо ылан, үлэлэрин былааныгар киллэрэн, төһө кыалларынан, туруорсуох буолан эрэннэрдилэр.
Амматтан Елена Александрова