Уопсастыба

Норуот дьокутаата Любовь Явловская Хотугу пуорум төгүрүк остуолугар кыттыыны ылла

Ил Түмэн дьокутаата, мэдиссиинискэй наука дуоктара, доруобуйа харыстабылын, социальнай харысхал, үлэ уонна дьарыктаах буолуу сис кэмитиэт бэрэссэдээтэлин солбуйааччы Любовь Явловская уустук усулуобуйаҕа Хоту дойду бигэ сайдыытын туһунан төгүрүк остуолга кыттыыны ылла.

Норуот дьокутаата кыттыыны ылбыт тэрээһинэ Хотугу пуорум иитинэн буолла.

Любовь Явловская «Саха сирин Арктикатыгар доруобуйа харыстабылын сайдыытын чэрчитэ» диэн дакылааты билиһиннэрдэ.

Парламентарий Арктика улуустарыгар баар кыһалҕалары арыйда. Хоту дойду олохтоохторун күн сириттэн барыыларын сүрүн төрүөтэ  сүрүннээн хаан баттааһынын уонна рак ыарыы буолалларын бэлиэтээтэ.

Төһө да Арктика улуустарыгар уустуктар баалларын үрдүнэн, эригийиэннээҕи былаас «Доруобуйа харыстабыла», «Демография» национальнай бырайыактары, федеральнай уонна өрөспүүбүлүкэтээҕи национальнай бырайыактары олоххо киллэриигэ кыаҕын, өйөбүлүн барытын ууран, үгүһү ситистэ.  

 2019 сыл кулун тутар 22 күнүгэр Федерация Сэбиэтин иһинэн үлэлиир Арктика уонна Антарктика Сэбиэтин мунньаҕар доруобуйа харыстабылын арктическай моделын боппуруостара көрүллүбүттэрэ. Онно доруобуйа харыстабылын эбийиэктэрин саҥардыы, түргэн Интэриниэтинэн хааччыйыы, оройуон  коэффициенын учуоттаан, биир кэмнээх компенсация кээмэйин төлөбүрүн оҥоруу, тыа сиригэр көһөн олоро барар эмчиттэргэ чэпчэтиилээх ипотека кирэдьиитин механизмын олоххо киллэрии, федеральнай бүддьүөт суотугар судаарыстыбаннай олорор дьиэ сэртипикээтин туһанары быһаарыы курдук боппуруостары бу мунньахха ырыппыттара, — диэн бэлиэтээтэ бэйэтин дакылаатыгар   норуот дьокутаата Любовь Явловская.

Этиитин түмүктүүрүгэр парламентарий Арктика улуустарын сайыннарыыга туһуламмыт Ил Түмэн дьокутааттарын уонна СӨ Доруобуйат харыстабылын министиэристибэтин кэккэ этиилэрин тиэртэ. Ол курдук, Любовь Явловская бэлиэтээбитинэн, федеральнай таһымҥа “Арктика төрүт олохтооҕо” диэн критерий уонна правовой статус олохтонуутун, «Арктикаҕа доруобуйа харыстабыла» уонна «Арктика аһа-үөлэ» диэн  РФ таһымнаах бырагыраамаларга эбии хос бырагырааманы ылыныы, Саха сиригэр салаалалар икки ардыларынааҕы «Арктика норуоттарын доруобуйата» научнай-технологическай комплексы тэрийии уонна маны научнай төрүөккэ олоҕуран Арктика төрүт олохтоохторун күннээҕи олохторугар туттуу курдук кэскиллээх боппуруостар  түмүллэн киирдилэр.

Норуот дьокутаата “бу туруорсуулар Судаарыстыбаннай Дуумаҕа, Федерация сэбиэтигэр уонна РФ Бырабыыталыстыбатыгар ыытыллыахтара” диэн иһитиннэрдэ.

 

Елена ПОТОЦКАЯ, «Саха сирэ» хаһыат, edersaas.ru

хаартыска — Ил Түмэн саайтыттан.

0
0