Учуутал күнүгэр Ил Түмэн Ыччат дьыалаларыгар, физическэй култуураҕа уонна спортка сис кэмитиэтин бэрэссэдээтэлэ Михаил Гуляев үөрэппит учууталын, кылааһын салайааччытын, хоту көһөрүллүү кыттыылааҕын, «Учууталлар учууталлара» бэлиэ хаһаайынын Анастасия Оконешникованы кытта көрүстэ.
edersaas.ru
Анастасия Самсоновна Оконешникова педагогическай үлэтин 1956 сыллаахха Чурапчы улууһун Мугудай орто оскуолатыгар алын сүһүөх кылаас учууталынан саҕалаабыта. Кэлин математика учууталынан үлэлээн, үгүс үөрэнээччини билиигэ-көрүүгэ уһуйбута.
Норуот дьокутаата Михаил Гуляев учууталыгар барҕа махтал тылларын этэн туран, тыыннаах сибэкки дьөрбөтүн туттарда. Учуутал уонна кини үөрэнээччитэ оччотооҕу кэми ахтан-санаан ыллылар.
— Үөрэппит оҕолорум олоххо ситиһиилэрин көрөрүм, кинилэр тустарынан үтүө сонуну истэрим – бу мин учуутал быһыытынан туохха да тэҥнэммэт дьолум, — диэн кырдьаҕас учуутал Анастасия Оконешникова үөрүүтүн үллэһиннэ.
Кырдьык да, учууталга кини үөрэппит оҕолорун махталларыгар тэҥнээх туох баар үһүө!
Светлана ДИОДОРОВА,
Дьокуускай к.
Хаартыскаҕа ааптар түһэриитэ.