Тыа хаһаайыстыбата

Норуот дьокутаата дьон кыһалҕатын быһаарсар

Ил Түмэн дьокутаата, парламент тыа сиригэр уонна аграрнай бэлиитикэҕэ кэмитиэтин бэрэссэдээтэлэ Андрей Находкин бэҕэһээ Майаҕа дьону кытта сэһэргэстэ. 

Дьокутааты кытта уон үс киһи көрүстэ. Бастакынан “Чүүйэ” хаһаайыстыба ыанньыксыта Маргарита Васильева киирдэ. Кэргэнэ Константин Куприяновтыын үлэһиттэргэ анаан сүөһү комплексын таһыгар тутуллубут түөрт кыбартыыралаах дьиэҕэ олороллор. Уон сыллааҕыта биир ынахтан саҕалаан, билигин 12 сүөһүлээхтэриттэн түөрдэ ыанар ынах, куурусса, сибиинньэ эмиэ иитэллэр. Сүөһүлэрин эһиэхтэрин баҕарбаттар. Ходуһа сирин көрдүүллэрин олохтоох дьаһалта сиргит суох, олорор дьиэҕит эмиэ суох диир. Ханна түбэһиэх оттооннор, сүөһүлэрин сыл таһаараллар. Кэргэнэ хаһаайыстыбаҕа бостууктуур. 17 сиэннээх эбэ-эһэ эбиттэр. Дьокутаат бу боппуруоска Ходоро нэһилиэгин дьаһалтатын кытары туох кыаллыбатын быһаарсан кэпсэтиэх буолла. Бэдьимэттэн кэлбит Саргылаана Андреева элбэх оҕолоохторго көрүллэр социальнай төлөбүрү 2012 сылтан көрдөһөр. Уочарата 300-тэн тахса киһиттэн саҕалаан, 200 иһинэн халбаҥныы сылдьар. Сэттэ оҕолооҕуттан кырата алтыс кылааска үөрэнэр, иккитэ ыал буолбуттар. Майаттан “Үһүс саас оскуолатын” салайааччыта, биллэр уопсастыбанньык Людмила Заровняева-Стручкова улууска биллэриллибит Дьоруой сылынан да сибээстээн, Белоруссияны кытта сибээһи саҥа таһымҥа таһаарарга, ыччаты патриотизм тыыныгар иитиигэ аҥаардас “кумааҕы эрэ информациятынан” буолбакка, олох тыыннаах туоһуларын кытта алтыһыннаран аҕа көлүөнэлэр тылларын-өстөрүн илэ иһитиннэрэн иитии көдьүүһүн хото туһанарга этиилээх киирдэ. Кинилэр, Майа кыргыттара, үйэ аҥаарын анараа өртүгэр Белоруссия Лоевскайдааҕы педучилищетыгар үөрэнэн, бэйэлэрин саха ыччаттарын быһыытынан чиэстээхтик көрдөрөн кэлбит кэмнэрин умнубат.

Биир оҕолоох эдэр ийэ, Майа лиссиэйин үлэһитэ Мария Колесова сэлиэнньэҕэ уһаайба учаастагын сэттис сылын көрдөһөрүн этэр. Хараҕа эргэрбит, сирэ ирэн эркинэ бүтүннүү хамсаан эрэр икки кыбартыыралаах дьиэҕэ олорор Эмма Павлова, улуус култууратын үлэһиттэрин идэлээх сойуустарын кэмитиэтин бэрэссэдээтэлэ, дьиэтэ тоҕо хаарбах дьиэ бырагырааматыгар киллэриллэрэ кыаллыбатын билэ илигин эттэ. Табаҕа олохтооҕо Сокол Марков икки этиилээх: бастакытынан, улуус иһигэр эккэ субсидия көрүллэригэр уонна, иккиһинэн, төрүччүлэри, ытык сирдэри чопчулааһыҥҥа кииннэммит үлэ барыан наада диэн. Майатааҕы М.К.Попова аатынан оҕо ускуустубатын оскуолатын үлэһитэ Александр Необутов икки улахан – Дьоруой Ф.К.Попов аатынан уонна Сэбиэскэй уулуссалары холбуур Алданскай уулуссатыгар тоҕо аспааллааһын үлэтэ үчүгэйдик барбатыттан мунаарарын иһитиннэрдэ. Павловскай олохтооҕо Аксиния Гермогенова уола аах, олохтоох дьаһалта суоппара, үс оҕолоох, улахана 10 сааһын туолар инбэлиит, Гаврил Гермогеновтаах икки этээстээх мас дьиэҕэ кыараҕас кыбартыыраҕа алтыа буолан симсэн олороллорун этэн, олорор усулуобуйаларын тупсарарга көмө көрдүүрүн тиэртэ. Майа олохтооҕо Валентина Шадрина өссө аҕыс сыллааҕыта дьиэни өлүүлэһэн туттарыыга 700 тыһ. солк. харчытын уган, түөкүннэргэ киирэн биэрбит.
Знание” уопсастыба Бочуоттаах лектора Александр Захаров саха омук олоҕун укулаатыгар киирсэр төрүт үгэһин – өртөөһүнү сатаан ыытыыны туруорсар, дойду салалтатыгар өртөөһүн Саха сиригэр баһаары сэрэтиигэ, тыаны чэбдигирдиигэ олус наадалаах ньыма быһыытынан өйдөтөр сыаллаах. Илии баттааччылар ортолоругар дьокутааты бэйэтин киллэрэр санаалааҕын Андрей Михайлович сөбүлэстэ. Өрөспүүбүлүкэҕэ биллэр, ытыктанар, тыа хаһаайыстыбатыгар үлэлээбит дьон илии баттааһыннарын хомуйан Президент Владмир Путиҥҥа тиксэрии соругун туруорар.
Норуот дьокутаата Андрей Находкин биир дойдулаахтарын кыһалҕаларын, туруорсууларын истэн, бэлиэтэнэн, сурунан, туох кыалларынан көмөнү оҥоро сатыах буолан эрэннэрдэ.


Майаттан Аркадий Иннокентьев, «Саха сирэ» хаһыат, edersaas.ru анаан.

0
0
Telegram @edersaas20