Кулун тутар 21-23 күннэригэр Дьокуускай куоракка саха интеллигенциятын биир чаҕылхай бэрэстэбиитэлэ – бөдөҥ учуонай-теоретик, уһулуччулаах судаарыстыбаннай уонна политическай деятель, бөлөһүөк, экэнэмиис Исидор Никифорович Барахов төрөөбүтэ 120 сылыгар аналлаах тэрээһиннэр ыытылыннылар.
Үөһээ Бүлүү улууһуттан — Исидор Барахов төрөөбүт дойдутуттан улахан дэлэгээссийэ кэлэн, бары тэрээһиннэргэ көхтөөх кыттыыны ылла.
Бэҕэһээ, кулун тутар 23 күнүгэр Дьокуускайга Суорун Омоллоон аатынан Опера уонна балет тыйаатырыгар Исидор Барахов төрөөбүтэ 120 сылыгар аналлаах өрөспүүбүлүкэ уопсастыбаннаһын үөрүүлээх мунньаҕа буолла.
Мунньахха, саха норуотун чулуу уола Исидор Барахов олоҕун, үлэтин туһунан сүрүн дакылааты СӨ Бырабыыталыстыбатын бэрэссэдээтэлин солбуйааччы, И.Н.Барахов 120 сыллаах үбүлүөйүн тэрийэр кэмитиэт бэрэссэдээтэлэ Михаил Гуляев оҥордо.
—Исидор Барахов, норуот уһулуччулаах уолаттарын Максим Аммосовы, Былатыан Ойуунускайы, Степан Аржаковы, Степан Васильевы кытта судаарыстыбаннаһы төрүттэспитэ. Кинилэр Саха сирэ сэбиэскэй уонна сэбиэскэй кэннинээҕи кэмнэргэ бары өттүнэн сайдарыгар кытаанах, халбаҥнаабат бөҕө акылааты түһэрбиттэрэ. Дойду түмсүүлээх буоларыгар, норуоттар доҕордоһууларын бөҕөргөтүүгэ сыаллаах-соруктаах бэлиитикэни ыыппыттара. Кинилэр тус хорсун быһыылара, политическай дьулуурдара, дьиҥнээх патриотизмнара уонна норуот бүттүүнүн дьылҕатын туһугар үрдүк эппиэтинэстээх буолуулара Сахабыт сирэ өрөспүүбүлүкэ статустанарын ситиһэригэр кыаҕы биэрбиттэрэ. Билигин Саха Өрөспүүбүлүкэтэ саха бастакы судаарыстыбаннай деятеллэрин ыра санааларын уонна дьыалаларын олоххо киллэрэр, — диэн бэлиэтээтэ Михаил Гуляев.
СӨ Ил Дархана Егор Борисов ыйааҕынан И.Н.Барахов биир дойдулаахтара — Үөһээ Бүлүү улууһун чулуу үлэһит дьоно судаарыстыбаннай наҕараадалары туттулар. Кинилэр ортолоругар СӨ үтүөлээх учууталын үрдүк аатын ылбыт учуутал В.Н.Николаев, “Арассыыйа-Саха сирэ 385 сыл” үбүлүөйдээх бэлиэнэн наҕараадаламмыт Ороһу нэһилиэгин баһылыга А.В.Антонов, о.д.а. бааллар.
Үөрүүлээх мунньахха СӨ Конституционнай Суутун бэрэссэдээтэлэ Александр Ким-Кимэн, Ил Түмэн сис кэмитиэтин бэрэссэдээтэлэ Алексей Еремеев, Дьокуускай куорат баһылыга Айсен Николаев, Үөһээ Бүлүү улууһун баһылыга Владимир Поскачин, Ем.Ярославскай аатынан судаарыстыбаннай мусуой дириэктэрэ Егор Шишигин, о.д.а. тыл эттилэр. Тэрээһиҥҥэ Исидор Барахов хос сиэнэ Татьяна Николаева, и.н.к, ХИФУ доцена Айтал Яковлев, И.Н. Барахов аатынан стипендиат Александра Макаренко кыттыыны ыллылар.
Исидор Барахов, сахалыы тылынан 1921 сыллаахха тахсыбыт “Манчаары” хаһыаты тэрийээччилэртэн биирдэстэрэ, эрэдээктэрэ этэ. Сэмэн Новгородов “Сахалыы сурук-бичик” буукубаара тахсыытын истиҥник өйөөбүтэ.
Саха сирин экэниэмикэтин, култууратын, наукатын сайдыытыгар бөдөҥ кылааттаах өрөспүүбүлүкэ, дойду таһымнаах талааннаах салайааччы Исидор Барахов аата уонна кини норуотун туһугар туруулаһан ыыппыт киэҥ хабааннаах үлэтэ, кини идиэйэлэрэ үйэлэргэ тыыннаахтар.
Татьяна МАРКОВА.
Андрей СОРОКИН хаартыскаҕа түһэриилэрэ.