Доруобуйа харыстабылын салаатыгар «Норуот билиниитэ-2017» өрөспүүбүлүкэтээҕи уопсастыбаннай бириэмийэҕэ куоластааһын ыам ыйын 23-31 күннэригэр ыытыллар. edersaas.ru
Куоластааһыны СӨ Доруобуйа харыстабылын министиэристибэтэ, «Сахамедстрах» АУо, «Стерх» Ауо, СӨ уопсастыбаннай бырайыактары уонна көҕүлээһиннэри өйүүр киинэ ыыталлар.
Норуот билиниитин бириэмийэтэ өрөспүүбүлүкэ доруобуйатын харыстабылыгар бэйэлэрин кылааттарын киллэрбит, биир идэлээхтэрин уонна нэһилиэнньэ ортотугар аптарытыатынан туһанар үрүҥ халааттаах аанньалларга туттарыллар. Кинилэри
«Идэҕэ бэриниилээх буолуу» (эмтиир тэрилтэҕэ 30-тан итэҕэһэ суох сыл үлэлээбиттэр кытталлар),
«Сүрэхпин оҕолорго биэрэбин» (оҕолору кытары үлэлиир быраастар),
«Биһиги таптыыр бырааспыт» (исписэлиис-быраастар),
«Амарах сүрэхтээх сиэстэрэ» (сиэстэрэлэр уонна фельдшердэр),
«Медицина туһугар» (техническэй үлэһиттэр)
номинацияларга эмтиир тэрилтэлэрэ түһэрэллэр. Холобур, искэни эмтиир өрөспүүбүлүкэтээҕи диспансер ыарыһахтар ортолоругар анкета толорторуу кэнниттэн кандидатуралары талла. Түмүккэ икки онколог-бырааһы Владимир Васильевы, Иван Борисовы уонна медицинскэй сиэстэрэ Надежда Константинованы кэккэ номинацияларга түһэрдилэр.
Кыайыылаахтары нэһилиэнньэ Zooma сайт – Zooma.top, Google Play — Zooma мобильнай сыһыарыынан интерактивнай куоластааһынынан быһаарар. Хас баҕарар номинаҥҥа куоластыахха сөп, ол эрээри куолаһы биир киһиэхэ биирдэ эрэ бэриллэр.
«Норуот билиниитин» ылбыт дьон аата Эмчиттэр күннэригэр, бэс ыйын 9 күнүгэр, биллэриллиэҕэ. Кыайыылаахтарга дипломнар уонна «Норуот билиниитэ» статуэтка, тэрийээччилэртэн өйдөбүнньүк бириистэр туттарыллыахтара.
Надежда ЕГОРОВА, «Саха сирэ» хаһыат, edersaas.ru