Норуот айымньытын Дьиэтэ 80 сааһын туолла

Бөлөххө киир:

Ааспыт үйэ саҕаланыытыттан, 1937 сыллаахтан ситиһиилээхтик үлэлээн кэлбит өрөспүүбүлүкэҕэ биир саамай кырдьаҕас култуура тэрилтэтэ бу күннэргэ төрүттэммитэ 80 сылын туолла.

edersaas.ru


Ол чэрчитинэн бэҕэһээ, сэтинньи 16 күнүгэр үбүлүөйгэ аналлаах кэмпириэнсийэ, кинигэ сүрэхтэниитэ, оттон бүгүн Медиа-кииҥҥэ, өрөспүүбүлүкэтээҕи Норуот айымньытын Дьиэтин араас сылларга дириэктэрдэрэ кыттыылаах “Дьыллар уонна дьоннор” пресс-конференция ыытылынна.

Бу, култуура эйгэтигэр, чахчы даҕаны, бэйэлэрэ хаама сылдьар номох буолбут дьон – ССРС култууратын туйгуна, САССР култууратын үтүөлээх үлэһитэ Гаврил Григорьевич Софронов, СӨ култууратын үтүөлээх үлэһитэ Надежда Семеновна Толбонова,  култуура үтүөлээх үлэһитэ Святослав Павлович Григорьев,  РФ култууратын үтүөлээх үлэһитэ Яна Викторовна Игнатьева итиэннэ Өрөспүүбүлүкэтээҕи норуот айымньытын Дьиэтин билиҥҥи дириэктэрэ, култуура туйгуна Сергей Степанович Семенов Норуот айымньытын дьиэтин баай историятыттан, сыалын-соругун, инники былааннарын туһунан кэпсээтилэр.

Култуура чулуу бэрэстэбиитэллэрэ, муусукаҕа ыстаарсай методист, СӨ култууратын туйгуна Анатолий Николаевич Семенов, фольклорист Петр Никифорович Попов, о.д.а. курдук, саха ырыатыгар, оһуохайга, олоҥхоҕо, национальнай бырааһынньыкпытын ыһыаҕы сөргүтүүгэ, саха таҥаһын пропагандалааһыҥҥа араас сылларга, чахчы даҕаны,  сүрэхтэрин сылааһын, өйдөрүн-санааларын барытын ууран, бэрт кыра хамнаска олус бэриниилээхтик үлэлээбит биир идэлээхтэрин истиҥник ахтан-санаан ыллылар, суруналыыстар ыйытыыларыгар хоруйдаатылар.

Саҥа үйэ саҕаланыытыттан Норуот айымньытын дьиэтэ ааттыын-суоллуун уларыйан-тэлэрийэн, араас уустук кэмнэри, кииннээһиннэри, холбоһуктааһыннары ааһан, дьэ, бу ааспыт 2016 сылтан, СӨ Аҕа баһылыгын дьаһалынан,  СӨ “Өрөспүүбүлүкэтээҕи Норуот айымньытын дьиэтэ” АУ диэн аатын ылла.

—Саха сирин култууратын ытык кырдьаҕас тэрилтэтэ — Норуот айымньытын дьиэтэ, биһиги өрөспүүбүлүкэбит норуоттарын култууралара, искусстволара сайдыытыгар бэйэтин тугунан да кэмнэммэт улахан кылаатын киллэрбитэ. Норуот айымньытын Дьиэтэ – бу аатыгар кини үрдүк миссията, анала көстөр. Онон, бэйэтин дьиҥнээх, төрүт аата төнүннэриллибитэ дириҥ символлаах, бэлиэ буолар, — диэтэ пресс-конференцияҕа Надежда Толбонова.

Биир идэлээхтэрин үбүлүөйүнэн Дьокуускай куораттааҕы Култуура управлениетын начаалынньыгын солбуйааччы Лариса Андреева, биллиилээх мелодист, педагог, муусукаан, суруналыыс Владимир Индигирскэй, о.д.а. эҕэрдэлээн тыл эттилэр.

Норуот айымньытын Дьиэтэ улуустардааҕы Култуура кииннэрин, тыа сирин нэһилиэнньэтин, өрөспүүбүлүкэ уус-уран кэлэктииптэрин, норуот маастардарын, мелодистары, худуоһунньуктары, айар талааннары  кытта үлэлэрин салгыы кэҥэтэр, өссө күүскэ сайыннарар былааннаах. Үгүс үлэ аудио-видео киин, фонда, научнай-методическай, айар лабораториялар үлэлэрин сайыннарыыга ыытыллыаҕа.

Татьяна МАРКОВА, «Саха сирэ» хаһыат, edersaas.ru

Надежда АКИМОВА хаартыскаҕа түһэриитэ.

+1
0
+1
0
+1
0
+1
0
+1
0
+1
0
+1
0