Норуодунай худуоһунньук Анна Зверева:”Саха искусствотын үс корифейыгар сүгүрүйэбин…”
Өрөспүүбүлүкэ судаарыстыбаннаһын күнүгэр саха талааннаах худуоһунньуга, иистэнньэҥ, норуот маастара, уус, уһуйааччы Анна Николаевна Зверева “СӨ норуодунай худуоһунньуга” үрдүк ааты сүктэ.
Россия Худуоһунньуктарын уонна Суруналыыстарын сойууһун чилиэнэ Анна Николаевна Зверева саха норуотун баай историятын быстыбат сорҕото буолар талааннаах үлэлэринэн төрөөбүт Сахатын сиригэр эрэ буолбакка, Россия уонна аан дойду таһымнаах бөдөҥ быыстапкаларга үгүстүк кыттар.
Саха ииһэ аан дойду түһүлгэтигэр
Ол курдук, быйыл атырдьах ыйын 10-13 күннэригэр Англия Бирмингем куоратыгар OF GUILTS – сахалыы эттэххэ, Аттаран тигии фестивалыгар Анна Зверева, хаһан да буоларын курдук, ситиһиилээхтик кыттан кэллэ. Бирмингем —Лондон кэнниттэн иккис турар бөдөҥ куорат. Бу куорат биир аатырар-сураҕырар өрүтүнэн, киэҥ далааһыннаах, араас эгэлгэ фестиваллары тэрийэн ыытара буолар.
Англияҕа быыстапкалары тэрийиинэн дьарыктанар Москватааҕы “Астрея” издательскай дьиэ дойду регионнарыттан киирбит үгүс үлэни көрөн баран, фестивальга кыттарга икки ааптары ыҥырбыта — Санкт-Петербург куораттан “Русское церковное зодчество” быыстапкалаах Ирина Воронина уонна Саха сириттэн аттаран тигии маастарын биһиги Анна Зверевабытын.
Бу быыстапка Бирмингем куорат сабыс-саҥа, кип-киэҥ быыстапкалыыр комплексыгар тардыллыбыт. Анна Зверева манна 60-ча — 40 бөдөҥ, 20 кыра кээмэйдээх үлэлэринэн кыттыбыт. Манна сахалыы кыһыҥҥы-сайыҥҥы таҥас кэмпилиэктэрэ, 5 көбүөр уонна ат киэргэлин араас көрүҥэ, чаппарааҕыттан бэрэмэдэйигэр, лэпсэтигэр тиийэ киирэллэр.
—Уопсайынан, англичаннар ат култууратын олус үрдүктүк туталлар эбит диэн кэллим. Көрүүлэрэ-истиилэрэ, сыһыаннара оннук. Саха сириттэн үһүө буолан сырыттыбыт – ХИФУ-тан филологическай наука доктора Людмила Ефимова, университет доцена, суруналыыс Ульяна Плотникова уонна мин. Россия секциятын биһиги, сахалар, Сергей Зверев тойугунан астыбыт. Хомуска оонньоон, Саха сирин туһунан киинэ көрдөрөн (“Саха” НКИХ-кэ махтал! ), кэпсээн-ипсээн, бэйэбит култуурабытын билиһиннэрдибит.
Билигин биһиги көлүөнэ аҕа саастаах дьон эйгэтигэр киирэбит — үүнэн иһэр көлүөнэбит, ыччаппыт, норуоппут чөллөөх буоларын туһугар эппиэтинэспит улахан. Онон, сахалар үгэс буолбут таҥаспытыгар-саппытыгар, аппыт киэргэлигэр салгыы үлэлиэм. Ат киэргэлэ – классическай, тугу да уларытар наадата суох. Норуот худуоһунньугун үрдүк аатын ылан тураммын, инники көлүөнэлэрбэр уонна үлэҕэ үөрэппит күн күбэй ийэбэр Мария Дмитриевна Корякина-Маттай Маайаҕа олус махтана саныыбын, кинилэр тэлбит суолларынан баран иһэр буоллаҕым… Саха искусствотын үс корифейын— Иннокентий Афанасьевич Потапов, Елена Еремеевна Аммосова уонна Римма Семеновна Гаврильева сырдык ааттарыгар сүгүрүйэбин. Мин кинилэр эрэллэрин түһэн биэрбэтим.
Махтанабын миигин куруутун өйдүүр, өйүүр чугас дьоммор – кэргэммэр Төгүл Сергеевич Зверевкэ уонна биир идэлээх доҕотторбор, дьүөгэлэрбэр, — диэтэ Анна Николаевна бу бэлиэ күн.
Татьяна МАРКОВА, «Саха сирэ» хаһыат, edersaas.ru