Уопсастыба

“Нолуок вычетын” төнүннэрии сайабылыанньатын онлайн толорор буолуохпут

Биллэрин курдук, нэһилиэнньэ үгүс өттө кыбартыыраны, дьиэни ипотека көмөтүнэн атыылаһар. Маныаха кинилэргэ “баай-дуол вычета” диэн көрүллэр. Ол эбэтэр, кирэдьиит ылбыт суумаларыттан уонна төлөөбүт бырыһыаннарыттан, дохуоттарын 13 бырыһыана төннөр. “Нолуок вычетын” ыларга докумуону туттарыы судургутуйар буолла.

edersaas.ru

Ити туһунан РФ Бырабыыталыстыбатын бэрэссэдээтэлэ Михаил Мишустин мунньах кэмигэр иһитиннэрдэ. “Нолуок вычетын” ыларга докумуону хомуйууну уонна декларацияны толорууну дьон ыарырҕатар. Бырабыыталыстыба маны судургутутуоҕа. “Баай-дуол вычетын” ылар туһугар, нолуогу төлөөччү тус кэбиниэтигэр киирэн сайабылыанньа эрэ толоруоҕа. Бу, дьон докумуонунан бэйэтин быраабын бигэргэтиитин судургутутуоҕа. Барытын нолуок федеральнай сулууспатын автоматизированнай систиэмэтэ оҥоруоҕа, холобура, ипотека кирэдьиитин биэрбит баантан информацияны ыыттаран көрүөҕэ. Өскөтүн, быһаарыы нолуок төлөөччү туһугар (положительное решение) ылылыннаҕына, сууманы киһи тус счетугар төнүннэриэҕэ” – диэн бэрэссэдээтэл эттэ.

Ону тэҥэ, билиҥҥитээҕэр бэрэбиэркэ түргэнник барыан уонна харчы үс ый устата буолбакка, эрдэ киириэ диэн иһитиннэрдэ.

Санатан эттэххэ, “нолуок вычета” кыбартыыраҕа эрэ буолбакка, үөрэххэ, эмпкэ-томко, эмтэниигэ, баайга-дуолга, инвестицияҕа, о.д.а. бааллар.

 

Людмила ПОПОВА, “Саха сирэ” хаһыат, edersaas.ru

Хаартыска: sibdom.ru

1
0

Добавить комментарий