Эһиилгиттэн нолуоктан көҕүрэтиини ылыы хаамыыта судургутуйуо. Ол эбэтэр, Федеральнай нолуогабай сулууспа саайтыгар баар тус кэбиниэккэ киирэн, декларация толорбокко, докумуоннары хомуйбакка эрэ, сайабылыанньа биэрэн, харчыны төнүннэриэххэ сөп буолуо.
Федерация Сэбиэтэ муус устар 14 күнүгэр НДФЛ нолуогу төнүннэрии хаамыытын судургутутар туһунан сокуону бигэргэттэ. Санатар буоллахха, хамнастан НДФЛ нолуогу төлүүр дьон дьиэ атыыластахтарына, эмтэннэхтэринэ, инвестицияны, үөрэҕи, о.д.а. төлөөтөхтөрүнэ, бу нолуоктарын төнүннэрэр кыахтаахтар. Биэнсийэлээхтэр уонна урбаанньыттар төнүннэрэр кыахтара суох, тоҕо диэтэр, кинилэр НДФЛ нолуогу төлөөбөттөр.
Нолуогу төнүннэрэргэ билигин 3-НДФЛ декларациятын суруйуохха, докумуоннар куоппуйаларын туттарыахха наада. Оттон бу сокуон олоххо киирдэҕинэ, быдан судургутуйар: декларация суруйар да, докумуон туттарар да ирдэммэт. Нолуок сулууспатын үлэһиттэрэ бэйэлэрэ бэрэбиэркэлииллэр.
Сокуон 2021 сыл тохсунньу 1 күнүттэн үлэлээн барыаҕа. Оттон быйыл нолуоктарын төнүннэриэн баҕалаахтар уруккунан, декларация суруйан ылаллар.
Ангелина Васильева, “Саха сирэ” хаһыат, edersaas.ru
Хаартыска: avto.ru