Бу күннэргэ нолуок сулууспата баай-дуол нолуогун ааҕыыны учуоттаабакка, дьонтон толору нолуогу көрдөөбүттэр диэн сурах интернет ситиминэн тарҕанна. Бу туһунан нолуок сулууспата дьоҥҥо маннык диэн быһаарар.
Нолуок сулууспата баай-дуол нолуогун дьон сайаапката суох быһа ааҕыыны оҥорон ыыталаата. Ол иһин, нолуок уорганыгар итинник сайаапкалаах киирэргит булгуччута суох. Санатан эттэххэ, баайга-дуолга нолуок 2017 с. кадастровай сыананан барыаҕа. Ол аата ырыынакка тахсар сыанатыгар чугас. Урут инвентаризационнай сыанатынан барара.
Кадастровай сыананан нолуогу ааҕыыга көһөрүгэр кыччатыы коэффициена ааҕыллыаҕа. Ону кытта, нолуоктаммат вычет систиэмэтэ туһаныллыаҕа:
— 10 кв. м. хас биирдии хоско,
— 20 кв.м. кыбартыыраҕа,
— 50 кв.м. олорор дьиэҕэ.
Маннык вычет нолуогу төлөөччүлэргэ барыларыгар сыһыаннаах. Сиргэ нолуогу ааҕыыга эмиэ уларыйыылар буоллулар. Нолуок кодексатын 391 ыст. 5-с. п. ыйыллыбыт дьоҥҥо (инбэлииттэр, Аҕа дойду Улуу сэриитин бэтэрээннэрэ, биэнсийэлээхтэр, РФ, ССРС Дьоруойдара уо.д.а.) биир учаастакка 600 кв.м. кадастровай сыанатынан кыччыыр.
Холобур, сир учаастага 600 кв. м. улахана суох буоллаҕына, сиргэ нолуок төлөммөт, оттон улахан буоллаҕына — нолуок хаалбыт сир кээмэйинэн ааҕыллар.
Тырааныспар нолуогар уларыйыы ыарахан сыаналаах эрэ массыыналарга сыһыаннаах. Нолуок төлөөччүлэргэ көмө быһыытынан www.nalog.ru сайтка «Налоговое уведомление 2018» диэн страница арылынна. Манна нолуок хайдах ааҕылларын көрүөххүтүн сөп.
Николай Попов, edersaas.ru