ФНС Дьокуускай куораттааҕы 5-с №-дээх иниспиэксийэтэ нолуоктарын төлөөччүлэргэ көмөлөөх буоллун диэн, бу ый 10-11 күннэригэр “Аһаҕас аан күнүн” тэрийэн ыыппыта. Онтон бу ый 25 күнүгэр бэйэ бас билэр баайын-дуолун нолуогун төлөөччүлэргэ анаан Дьокуускайга 202 микро-оройуон, 23 куорпуһун оперсаалатыгар уонна Намҥа Ленин уулуссатын 20-гэр тэрийэн ыытары былаанныыллар.
Нолуок туһунан билиэн-көрүөн, ыйыталаһыан, чопчулаһыан баҕалаахтар бу күн 10.00-тан 15.00 чааска диэри кэлэн сүбэ-ама ылыаххытын сөп. Эбэтэр РФ ФНС «Личный кабинет налогоплательщика для физического лица» интэриниэт-сервис өҥөтүнэн туһанан регистрацияланыаххытын сөп диэн нолуогу төлөөччүлэри кытары үлэлэһэр отдел исписэлиистэрэ иһитиннэрэллэр.
“Аһаҕас аан күнүгэр” исписэлиистэр нолуок кээмэйин, ким төлүөхтээҕин, болдьоҕун сиһилии быһаарыахтара, ыйытыыларгытыгар хоруйдары биэриэхтэрэ.
Бэйэҕитин туоһулуур докумуоннаах, учуокка турбуккутун көрдөрөр докумуоҥҥутун эбэтэр куопуйатын (учуокка турбуккут туһунан туоһулуур кумааҕыгытын) илдьэ кэлэргитигэр сүбэлииллэр.
Нолуок туһунан билиэххин баҕарар буоллаххына, бу күнү куоттарыма.
Биһиги корр., «Саха сирэ» хаһыат, edersaas.ru