Бэҕэһээ Амма улууһун Өнньүөһүгэр «Дуораанчык» уһуйаан иитиллээчилэрэ уонна кэлэктиибэ 1970-с сыллардааҕы хаарбах туруктаах мас дьиэттэн таас, толору хааччыллыылаах саҥа дьиэҕэ көстө.
75 миэстэлээх уһуйаан дьиэтэ “Демография” национальнай бырайыагынан уонна “Алмазэргиэнбанк” АУо өйөбүлүнэн тутулунна.
Норуот дьокутаата Руслан Федотов «Дуораанчык» оҕо уһуйаанын үлэһиттэрин, иитиллээччилэрин уонна төрөппүттэри күүтүүлээх тутуу үлэҕэ киирбитинэн итиитик-истиҥник эҕэрдэлээтэ. Аныгы ирдэбилгэ эппиэттиир усулуобуйалаах уһуйаан саҥа дьиэтэ үлэтэ ситиһиилээх, таһаарыылаах буоларыгар
олук буолар диэтэ. Ил Дархан Айсен Николаев өрөспүүбүлүкэ парламеныгар туһаайбыт Анал этиитигэр кэлэр 2022 сылы Саха сиригэр Ийэ сылынан биллэрбитин, бу быһаарыы ийэ буолуу социальнай статуһун үрдэтэр сыаллааҕын туһунан иһитиннэрдэ. Ол курдук, 2022 сылга Саха сиригэр оскуолалары, оҕо саадтарын, балыыһалары, култуура дьиэлэрин, спортивнай комплекстары тутууга, хаарбах дьиэлэри көһөрүүгэ 42 млрд солк. кэриҥэ көрүллэрин туһунан кэпсээтэ. Эһиил Саха АССР төрүттэммитэ 100 сылынан 2022 сылга Саха сиригэр төрөөбүт хас биирдии оҕоҕо 100-түү тыһыынча солкуобай көрүллэрин, ону тэҥэ, биэстэн элбэх оҕолоох ыаллары нолуоктан толору босхолуур туһунан киирбитин туһунан кэпсээбитин сэлиэнньэ дьоно үөрэ иһиттилэр. «Онон бу «Дуораанчык» уһуйааҥҥа сылдьар оҕо ахсаана сыллата элбиэ диэн эрэнэбин» – диэн Руслан Еремеевич эттэ.
Бу дьоро күнүнэн СӨ экэниэмикэҕэ миниистирэ Майя Данилова, Ил Түмэн дьокутаата Руслан Федотов, улуус баһылыга Николай Архипов, үөрэх управлениетын салайааччыта Юрий Шишигин эҕэрдэлээтилэр уонна Ил Дархан, Ил Түмэн, улуус баһылыгын наҕараадаларын туттардылар.
Аграфена Матвеева.
Хаартыска Амма улууһун дьаһалтатыттан.