Аммаҕа Өнньүөс саҥа уһуйааннанна. Бүгүн ол үөрүүтэ-көтүүтэ буолла.
Бүгүн, ахсынньы 17 күнүгэр, Амма улууһун Өнньүөс сэлиэнньэтигэр 75 миэстэлээх уһуйаан аһылынна. Мантан 25 миэстэ үһүгэр диэри саастаах кырачааннарга ананар. Саҥа тутуу «Демография» национальнай бырайыак иитинэн, «Дьахталлар дьарыктаах буолууларыгар — үстэригэр диэри саастаах оҕолорго оскуола иннинээҕи үөрэҕи тэрийии» федеральнай бырайыагынан олоххо киллэрилиннэ. Эбийиэк 197,696 мөл.солк., улахан аҥаара федеральнай бүддьүөттэн.
«Саҥа үөрэтэр эйгэ итиннэ сөп түбэһэр инфраструктураны ирдиир. Саха сирин оҕолоро, ханна олороллоруттан тутулуга суох, кыраларыттан тупсаҕай усулуобуйаҕа иитиллиэхтээхтэр. Үһүгэр диэри саастаах оҕолоох ийэлэр кырачааннарын туһугар долгуйбакка, үлэҕэ тахсар кыахтаныахтаахтар. Ол иһин биһиги дьааһыла бөлөхтөөх уһуйааннары инники күөҥҥэ тутабыт«, — диэн СӨ Ил Дархана Айсен Николаев бэлиэтээн турар.
СӨ Экэниэмикэ миниистирэ Майя Данилова СӨ Бырабыыталыстыбатын аатыттан бэлиэ күнүнэн олохтоохтору эҕэрдэлээн туран, нэһилиэккэ оҕолору үөрэтэргэ табыгастаах, тупсаҕай усулуобуйа баар буолбутун ыйда. Миниистир 2013 сыллаахха таас оскуола тутуллубутун, аны бу сырыыга, РФ Бэрэсидьиэнэ Владимир Путин көҕүлээһининэн национальнай бырайыагынан таас уһуйаан тутуллубутун, бу олох хаачыстыбата тупсан иһиитин көрдөрөрүн эттэ.
Уһуйаан сэбиэдиссэйэ Полина Кононова нэһилиэккэ социальнай эбийиэктэр саҥардыллалларын түмүгэр, эдэр ыаллар ахсааннара элбиирин үөрэн бэлиэтээтэ. Кырачааннарын дьааһыла бөлөҕөр биэриэн баҕалаах төрөппүттэр баалларын эттэ. Маныаха саҥа дьиэ бары тэрилинэн хааччыллыбыта кыаҕы биэрэрин иһитиннэрдэ. Бу иннинэ «Дуораанчык» уһуйаан үөрэҕэ 1998 сыллахха тутуллубут уонна анаан оҥоһуллубут оскуола мастарыскыайын дьиэтигэр ыытыллара.
Саха сиригэр «Демография» национальнай бырайыагынан, ийэлэр дьарыктаах буолалларын туһугар, оҕо саадтарыгар уочараты суох оҥорорго былааннаах үлэ ыытыллар. Үһүгэр диэри саастаах оҕолорун көрөн уоппускаҕа олорор 203 дьахтар эбии үөрэммит уонна квалификацияларын үрдэтиммиттэр. Оттон 2024 сыл бүтүөр диэри балтараатыттан үһүгэр диэри саастаах бары кырачааннар уһуйааннарга миэстэнэн хааччыллалларын ситиһэр сорук турар.
sakha.gov.ru ылылынна.
+1
+1
+1
+1
+1
+1
+1