«Ниссан X-Trail» сүрүн ыарыыта

Бөлөххө киир:

Мэхээньиктэр ханнык баҕарар массыына мотуора бэйэтэ туспа «ыарыылаах» буолар диэн этэллэр. Ааспыкка «Ланд крузер Прадоны» билиһиннэрбит буоллахпытына, аны «Ниссан X-Trail” уочарата кэллэ. Онно сүрүн сүбэһитинэн автоэлектрик Дьулус Кучаров буолар.

Александр ТАРАСОВ, «Саха сирэ» хаһыат, https://edersaas.ru

Бу массыына колен уонна распред валларын датчиктара ордук кэбирэхтэр. Балары атыннык, датчик-холла диэн ааттыыллар. Үгүстүк мотуор итиитин тулуйбакка алдьаналлар. Датчик иһигэр баар электроника ыһыллар. Датчик алдьаннаҕына массыына собуоттаммат буолар. Итини тэҥэ, мотуорун сыаба (ГРМ – газораспределительный механизм) кэбирэх оҥоһуулаах. Мотуорга кутуллубут арыы хаачыстыбата мөлтөх эбэтэр кэмигэр уларыйбакка сылдьыбыт буоллаҕына, сыап быһа барыан сөп. Аны туран, манна арыы баарын-суоҕун сотору-сотору бэрэбиэркэлэниллиэхтээх. Анал кээмэйтэн түстэ даҕаны, кутан биэриллиэхтээх. Өр кэмҥэ сөптөөх таһымҥа сылдьыбатаҕына, сыап эмиэ өр барбат. Үксүгэр «X-Trail”лэр итинтилэрэ алдьанан автосервиска соһуллан кэлэллэр.

Датчик массыына компьютерыгар тимир көлө чааһа хайдах үлэлиирин, үлэлиэхтээҕин туһунан иһитиннэриини тиэрдэр. Атыннык эттэххэ, «хобуоччулуур». Холобур, салгын датчига төһө салгын киирэн эрэрин, киириэхтээҕин быһаарар. Ол салгыҥҥа төһө бензин ыһыллан киириэхтээҕин суоттуу охсон, оччону биэрэргэ көмөлөһөр. Салгын датчига алдьанан сыыһа көрдөрөн бардаҕына, элбэх бензини сиэн ороскуоту элбэтиэн сөп. Итинтэн сылтаан массыына кыаммат буолар.

Онон датчик оруола улахан. Массыына систиэмэтэ барыта этэҥҥэ үлэлииригэр көмөлөһөр. Мотуор температурата төһө буоларыттан саҕалаан коленвал төһө түргэнник эргийэрин кытта билэр уонна ону сүрүн систиэмэҕэ тиэрдэллэр.

Этэҥҥэ айаннааҥ.

Александр ТАРАСОВ, «Саха сирэ» хаһыат, https://edersaas.ru

+1
0
+1
0
+1
0
+1
0
+1
0
+1
0
+1
0