Уус Алдан улууһун «Танда» кэпэрэтиибэ ынах сүөһүтүн икки сиринэн сайылатан турар.
edersaas.ru
Ол курдук, 200-чэкэ ыанар ынах уонна 150 ньирэй Сытыган сайылыгар, 210 субан сүөһү Кыттаайы учаастагар бааллар. Ньирэйдэри көрүүгэ ыччат сүөһүнү иитиигэ идэтийбит Алексей Егоров салалтатынан оскуола оҕолоро — уолаттар үлэлииллэр. Танда орто оскуолатын үөрэнээччитэ Уйгун Неустроев ньирэй көрөр буолбутугар, аймахтара, Мэҥэ Хаҥалас улууһун Алын Бэстээҕиттэн сайылыы кэлбит Никита уонна Коля Неустроевтар кинини кытары үлэлииргэ быһаарыммыттар.
Урукку сыллартан туруу үлэһит дьоннооҕунан аатырар нэһилиэк ыччаттара ити курдук улахан дьону кытары тэҥҥэ үлэлии-хамсыы сылдьаллара, сайыҥҥы уһун өрөбүллэрин туһалаахтык атаараллара биир саастыылаахтарыгар холобурга туруоруллуон сөп.
– Уолаттар маладьыастар, бэркэ үлэлииллэр – диэн хаһаайыстыба кылаабынай зоотехнига Варвара Хосподоева хайгыан хайгыыр.
Раиса Сибирякова, «Саха сирэ» edersaas.ru