Нина Алексееваҕа Саха Өрөспүүбүлүкэтин норуодунай учуутала аат иҥэрилиннэ
Саха сирин Ил Дархана Айсен Николаев тус бырагырааманан оҕолору үөрэтэр тиэхиньиичэскэй лиссиэй дириэктэригэр Нина Афанасьевна Алексееваҕа «Саха Өрөспүүбүлүкэтин норуодунай учуутала» ааты иҥэрдэ.
Нина Афанасьевна аата өрөспүүбүлүкэбитигэр киэҥник биллэр. Кини үөрэххэ сонун хайысханы толкуйдаан, оҕону үөрэтиигэ бэйэтин систиэмэтин киллэрбитэ.
Кини 1993 сыллаахха 11 сыллаах оскуола бырагырааматын оҕо 5-6 сылынан билэр оскуоланы тэрийбитэ. Бу сыллар устата Нина Алексеева лиссиэйин 650 оҕо бүтэрдэ. Бу оҕолор улахан аҥаардара үөрэхтэрин кыһыл көмүс мэтээлинэн, сүүстэн тахса оҕо үрүҥ көмүс мэтээлинэн түмүктээбиттэрэ.
Лиссиэй выпускниктара билигин араас эйгэҕэ биллэр-көстөр, ситиһиилээх исписэлиистэр буолан үлэлии-хамныы сылдьаллар. Ол курдук, ЮНИСЕФ ООН исписэлииһэ, ракета инженер-конструктора, лазернай технология, авиакосмическэй бырамыысыланнас инженердэрэ уо.д.а.
Оттон 13 саастаах Богдан Тарасов билигин А.Н. Туполев аатынан Казаннааҕы национальнай чинчийэр тиэхиньиичэскэй университеккэ үөрэнэ сылдьар. Кини Татарстан бэрэсидьиэнин истипиэндьийээтэ буолбута.
Нина Алексеева — СӨ үөрэҕин үтүөлээх үлэһитэ, наука уонна тиэхиньикэ уобалаһыгар СӨ судаарыстыбаннай бириэмийэтин лауреата.
yakutia-daily.ru саайтан.