Уопсастыба

Николай Винокуров үтүө саҕалааһына

Дьокуускай куорат олохтооҕо Николай Винокуров үтүө дьыаланы саҕалаан, олорор уопсай дьиэтин тэлгэһэтигэр оҕо оонньуур былаһааккатын кырааскалаан, саҥардан биэрдэ.

Оҕо оонньуур былаһаакката Дьокуускай олохтоохторун кыһалҕалаах боппуруостарыттан биирдэстэрэ. Куорат таһынааҕы дьиэлэр үксүлэригэр оҕо оонньуур былаһааккалара саҥардыллыбатахтара ыраатта. Биир оннук кыһалҕалаах оройуонунан аэропорт таһынааҕы олорор дьиэлэр буолаллар.

Николай Винокуров Кузьмин уулуссатын 16/1 дьиэтин тэлгэһэтигэр оҕо оонньуур былаһаакката саҥардылларын кэтэһэ, туруорса сатаан баран, бэйэтэ кырааскалыырга, тупсарарга быһаарыммыт. Бэйэтин үтүө саҕалааһынын туһунан кэпсииригэр көрдөстүм:

— Оҕо оонньуур былаһааккатынан дьарыктанар санаа өссө 2017 сыллаахха, кыыһым күн сирин көрбүтүгэр, үөскээбитэ. Бэйэбит олорор эрэ дьиэбит таһыгар буолбакка, куорат араас оройуоннарыгар баар оҕо оонньуур былаһааккаларыгар болҕомтобун уурбутум. Ол саҕана, куорат үгүс олохтоохторун курдук, оҕо былаһааккаларынан муниципальнай былаас эбэтэр ТСЖ дьарыктаныахтаахтар дии саныырым.  Ол сыл «куорат тупсаҕай эйгэтин тэрийии» бырагыраама саҕаламмыта.

Бырагыраама чэрчитинэн олохтоох дьон уопсай мунньаҕын ыытан, уларытыы бырайыагын оҥорон, олохтоох дьоҥҥо илии баттатан,  анаан дьарыктанар кэмитиэккэ сайаапка түһэрэн баран кэтэһиллиэхтээҕэ. Бырагыраама ирдэбилин барытын толорбутум кэнниттэн, сотору кэминэн Дьокуускай куорат Кузьмин уулуссатын 16/1 дьиэтигэр оҕо оонньуур былаһааккатыгар 2018 сылга харчы көрүллэрин туһунан эппиэт кэлбитэ. Ол эрээри көрөргүт курдук, 2021 сыл буолла даҕаны, туох да уларыйыы суох.

Билигин кыыһым улаатан, оҕо былаһааккатыгар элбэх бириэмэни атаарар. Толкуйдаан көрбүтүм, оҕо хайдах усулуобуйаҕа, тулатыгар тугу көрөн улаатара улахан суолталаах эбит. Тулалыыр эйгэ кыра киһи өйүгэр-санаатыгар сабыдыаллыыра саарбахтаммат. Күн ахсын курус самныбыт көстүү оҕону ааһан, улахан даҕаны киһини депрессияҕа тиэрдиэн сөп.

Дьаһалта өттүттэн дьайыы суоҕун көрөн, оҕо былаһааккатыгар бэйэм ылсан, саатар биир истииллээх гына кырааскалыырга санаммытым. Былаһаакканы барытын кырааскалыырга  барыта 5000 солк кэриҥэ харчы уонна 14 чаас тус бириэмэм барда.

Өрөспүүбүлүкэ олохтоохторугар туһаайан «булгуччу оҥоруохтааххыт» диэн баран кэтэһэн олорбокко, бэйэҕит хамсаныҥ диэн этиэхпин баҕарабын. Хаарыан күнү-дьылы бараабакка, киһи бэйэтэ оҥороро быдан түргэн уонна чэпчэки даҕаны.

Ол бэйэтэ үтүө өрүттээх — бастатан туран,  үүнэр көлүөнэҕэ үтүө холобуру көрдөрөҕүт, ону тэҥэ олорор дьиэҕит тэлгэһэтин көрөр-харайар үөрүйэхтэнэҕит. Киһи хаһан баҕарар, бэйэтин илиитинэн оҥорбут үлэтин быдан сыаналыыр, харыстыыр.

Биһиги өрөспүүбүлүкэбитигэр бэйэлэрин баҕа өттүлэринэн уопсай үлэни тэрийэр энтузиастар элбииллэрин баҕарабын. Тулабыт тупсарын туһугар бэрт кыраттан саҕалаан элбэҕи оҥорон эрэ баран, дьаһалта үлэтин отчуоттуурун холкутук ирдиир бырааптаахпыт. Баҕа өттүнэн тупсарыы көмөтүнэн өрөспүүбүлүкэбит чэчирээн барыаҕа, — диэн бэйэтин үтүө саҕалааһыныгар өрөспүүбүлүкэ олохтоохторо кыттыһалларыгар ыҥырар.

Бэлиэтээн эттэххэ, сорох олорор уопсай дьиэлэр тэлгэһэлэригэр былаһааккалар олох да суохтар. Холобур,  Кальвица

уулуссатын  1 нүөмэрдээх дьиэтигэр оҕо оонньуур былаһаакката букатын даҕаны кураанах турар…

Надежда Ильина, «Саха сирэ» хаһыат, edersaas.ru

0
0
Telegram @edersaas20