Доруобуйа

Николай Васильев ковиды эмтээһиҥҥэ бастыҥ бырааһынан ааттанна

Ил Дархан Айсен Николаев Анал этиитигэр «Ковид кэнниттэн чөл олох» анал социальнай бырайыагы олоххо киллэрэр наадатын туһунан эттэ. «Үтүө үгэскэ кубулуйбутунан, сыл бастыҥ үлэлээх дьоно Анал этиигэ ыҥырыллан кытталлар. Бүгүн кинилэр бу саалаҕа бааллар», — диэн туран, Айсен Сергеевич коронавирус ыарыыны утары охсуһууга өҥөлөрүн иһин бастыҥ үлэлээх быраастары ааттаталаата. Кинилэр ортолоругар, Нам улууһун Оройуоннааҕы киин балыыһатын бырааһа Николай Владимирович Васильев бу кутталлаах ыарыыны утары үлэлээн, биир дойдулаахтарын махталларын, билиниилэрин толору ылар.

 

Николай Владимирович 2013 сыллаахха М.К. Аммосов аатынан ХИФУ мэдиссиинискэй институтун «Эмтээһин дьыалата» факультетын кыһыл дипломунан бүтэрэн, интернатураны ааспыта. Кини 2014 сыллаахха СӨ Доруобуйа харыстабылынан министиэристибэтин анааһынынан Нам улууһун Киин балыыһатыгар терапевт-бырааһынан  үлэлии кэлбитэ. Онон, Николай Владимирович кэргэнин, невролог-быраастыын «Тыа сирин эмчитэ» бырагырааманан Нам улууһугар номнуо 5-с сылларын үлэлииллэр.
Пандемия саҕаланыаҕыттан Николай Васильев көһө сылдьар биригээдэҕэ уонна сытар балыыһаҕа мэдиссиинискэй көмөнү оҥорууга үлэлээн, эмтэнээччилэртэн элбэх махталы ылбыта.
Ковид саҕаланыаҕыттан, 2020 сыл ыам ыйыттан 3-с нүөмэрдээх инфекционнай отделение сэбиэдиссэйинэн ананан, «кыһыл зонаҕа» ыараханнык ыалдьыбыт дьону кытта үлэлиир. Онтон ыла ковид намыраатаҕына, сыһыарыллыбыт учаастагар терапевт бырааһынан төннөн кэлэн үлэлиир, оттон ковид ыарыылаахтар элбээтэхтэринэ, «кыһыл зонаҕа» көһөрүллэр.

Николай Васильев — Намнааҕы Киин балыыһа 2016 с. – «Сытар балыыһа бастыҥ бырааһа», 2018 с. «Поликлиника бастыҥ бырааһа» номинацияларын хаһаайына. Эмтэнээччилэр уонна үлэлиир кэлэктиибэ кини үлэтигэр үрдүк эппиэтинэстээҕин, олус дьаныардааҕын уонна сэмэйин бэлиэтииллэр.

ЫСПЫРААПКА:

Бастыҥ быраастарынан ааттаннылар;

Кирилл Викторович Чулаков – Өрөспүүбүлүкэтэҕи килиниичэскэй балыыһа реанимацияҕа отделениетын сэбиэдиэссэйэ;
Сардана Николаевна Васильева – «Суһал көмө» Дьокуускайдааҕы ыстаансыйатын биэлсэрэ;
Николай Владимирович Васильев – Нам улууһун Оройуоннааҕы балыыһатын учаастактааҕы бырааһа;
Татьяна Сергеевна Архангельская – ХИФУ Мэдиссиинискэй институтун «Эмтээһин дьыалата» факультетын волонтер-миэдигэ;
Диана Вахаевна Эльмурзаева — ХИФУ Мэдиссиинискэй институтун «Эмтээһин дьыалата» факультетын волонтер-миэдигэ;
Елизавета Афанасьевна Карпеш – «Инбэлииттэри биир кэлим чөлүгэр түһэрэр өрөспүүбүлүкэтээҕи социальнай-чэбдигирдэр киин» невролог-бырааһа.

Надежда ЕГОРОВА, «Саха сирэ», edersaas.ru

 

1
0
Telegram @edersaas20