Спортивнай диэйэтэл, Госдуума экологияҕа, тулалыыр эйгэни харыстааһыҥҥа кэмитиэтин бэрэссэдээтэлин бастакы солбуйааччы Николай Валуев Горнайдааҕы А.А. Агеев аатынан Оҕо спортивнай оскуолатын иитиллээччилэрин кытта көрүстэ уонна Бэс Күөлүгэр сырытта.
Кини ойуур баһаарыттан эмсэҕэлээбит олохтоохторун уонна Илиҥҥи байыаннай уокурук байыастарын кытта көрүстэ. Николай Валуев айылҕа иэдээниттэн эмсэҕэлээбит инфрастуктураны чөлүгэр түһэрэр оперативнай ыстаап салайааччыта Дмитрий Бердниковы кытта тутуу былаһааккатын көрдүлэр.
— Билигин дойду болҕомтотугар — ойуур баһаарыттан эмсэҕэлээбит өрөспүүбүлүкэ кыһалҕата. Тымныы түһүөн иннинэ баһаартан эмсэҕэлээбит Бэс Күөлүн олохтоохторо дьон олорор дьиэлэригэр киирэллэрин ситиһиэхпит. «Биир Ньыгыл Арассыыйа» баартыйа Бүтүн сойуустааҕы ыстааба баһаарга түбэспит тыа сирин олохтоохторун доруобуйаларын чөлүгэр түһэриигэ өйөбүл быһыытынан санаторнай-курортнай эмтэниигэ ыытыаҕа. Баһаартан эмсэҕэлээбит ыаллар эрэгийиэннээҕи уонна федеральнай көмөнү ыла олроллор, — диэн бэлиэтээтэ Николай Валуев.
Спортивнай диэйэтэли кытары «Молодёжка ОНФ» хамсааһын волонтердара кэлэн, Бэс Күөлүгэр баһаартан эмсэҕэлээбиттэргэ көмөлөһөллөр. Николай Валуев Бэс Күөлүгэр ыытыллыбыт «Ойууру харыстыахха» диэн Бүтүн сойуустааҕы аахсыйаҕа кыттыста. 40 бэһи Кыайыы болуоссатыгар олортулар уонна уот сиэбит тыатыгар 300 тиити олортулар.
Елена ПОТОЦКАЯ, “Саха сирэ” хаһыат, edersaas.ru