– Бары билэрбит курдук, Арассыыйа Конституциятыгар ‒ Төрүт Сокуоммутугар уларытыылары киллэрэр туһунан дойдубут Бэрэсидьиэнэ Владимир Путин быйыл тохсунньу 20 күнүгэр, үгэс быһыытынан сылын аайы Судаарыстыбаннай Мунньахха туһаайар Анал этиитигэр эппитэ. Ол эрээри, аан дойду үрдүнэн тарҕаммыт коронавирус ыарыыта биһиги судаарыстыбабытын тумнан ааспата. Дойду бүттүүнүн үрдүнэн бу хара хамсыгы утары охсуһуу дьаһаллара ылыныллан дьоммутун-сэргэбитин эмтиир, сэрэтэр уонна харыстыыр үлэлэр бара туралларынан, „Ковид-19“ ыарыы намыраабытын кэннэ, бары санитарнай ирдэбиллэри тутуһан от ыйын 1 күнүгэр ыытыллыаҕа.
Билигин үлэлии турар Конституциябытын 1993 с. ахсынньы 12 күнүгэр Арассыыйа бүттүүнүн үрдүнэн куоластаан ылынан турабыт. Дойдубут дьоно-сэргэтэ бу сыллар тухары норуоттар тэҥ буолууларын уонна бэйэлэрин быһаарыныыларын бириинсиптэригэр олоҕурбут гражданскай уопсастыбаны ситиһиилээхтик тутабыт. 1993 сыллааҕы Төрүт Сокуоммут дойду туруктаах уонна инникигэ туһаайыылаах сайдыытын эрэллээхтик хааччыйда. Хас биирдии Арассыыйа олохтооҕо бэйэтин быраабын толору билиэхтээх, кыһалҕата суох олорорун туһугар баар сокуоннары сөпкө туһаныахтаах диэн санаанан салайтарабыт. Бэрэсидьиэммит эппит уларытыылара киирдэхтэринэ, Конституциябыт эбии кыаҕырар-күүһүрэр. Мантан сиэттэрэн дойдубут бары эйгэтигэр тахсыахтаах сайдыы аартыгын уларыйыылара, биһиэхэ барыбытыгар өссө улахан соруктары туруораллар. Бу Конституциянан салайтаран устуоруйабытыгар саҥа кэрдиис кэм саҕаланыаҕа. Бары бииргэ Ийэ дойдубут устуоруйатын саҕабыт, кэлэр кэскилин түстүүбүт. Сылтан сыл биһиги дойдубут бөҕөргөөн, дьон-норуот бүттүүнүн олоҕо эбии тупсан иһэригэр саҥардыллыбыт Төрүт Сокуоммут олук охсоругар эрэнэбин!
Күндү улууспут олохтоохторун Арассыыйа Конституциятыгар уларытыылары киллэрэр туһугар буолаары турар куоластааһыҥҥа дириҥник толкуйдаан, инники кэскили, соруктары үчүгэйдик ырытан, куоластааһыҥҥа кыттаргытыгар ыҥырабын, – диир Николай СТАРОСТИН, улуус баһылыга.
«Эркээйи» хаһыат, ulus.media