Бүгүн, сэтинньи 30 күнүгэр, Дьокуускай куорат федеральнай суутугар Ил Түмэн урукку дьокутаата Николай Румянцев дьыалатын көрүү саҕаланна.
Судьуйа — Анатолий Каратаев, судаарыстыбаннай буруйдааччы — Саргылана Холмогорова. Суут кыттыылаахтара — сууттанааччы Николай Румянцев, эмсэҕэлээччилэр Владимир Федоров, Антонина Сивцева уонна кинилэр интэриэстэрин көмүскүүр адвокаттар.
Бүгүҥҥү суут мунньаҕар сууттанааччы Румянцев хадатаайыстыба киллэрдэ: «Колми» юриһа Валерий Филатовы көмүскээччи быһыытынан кытыннарарга диэн. Суут ону өйөөтө.
Филатов «дьыаланы билсэргэ» диэн икки күнү көрдөөбүтүн, судьуйа ахсынньы 11 күнүгэр диэри тохтобулу биллэрдэ.
Санатар буоллахха, “Колми” автосалон генеральнай дириэктэрин солбуйааччы Николай Румянцев (суут мунньаҕар «солбуйааччыбын» диэтэ) 2017 сыл балаҕан ыйын 7 күнүгэр Тулагы сэлиэнньэтин аттыгар киэһэ хараҥаҕа, күүстээх ардахха «Ниссан Патрол» массыынатынан итирик туруктаах айаннаан иһэн, үс киһини түҥнэри көппүтэ. Биир киһи сонно тута тыына быстыбыта, икки киһи эчэйии ылбыта.
Силиэстийэ уорганнара бу чахчынан РФ Холуобунай кодексатын 264- с ыст. 4-с чааһынан, ол эбэтэр, суол быраабылатын кэһэн, массыынаны итирик туруктаах ыытан, сэрэҕэ суохтан киһини өлүүгэ тиэрдии бэлиэтэ баарынан, холуобунай дьыала тэрийбиттэрэ.
Румянцев силиэстийэ кэмигэр, 2017 сыл балаҕан ыйын 11 күнүттэн дьиэтээҕи хаайыыга ууруллубута. Алтынньы 2 күнүттэн СӨ Үрдүкү суута ити хааччахтыыр миэрэни уларытан, дьиэтээҕи хаайыыттан 1,5 мөл. солк. солуогунан босхолообута. Суут хааччахтыыр миэрэни уларытарыгар, Румянцев эмсэҕэлээччилэргэ — өлүөхсүт оҕолоругар, ону таһынан, икки киһи эмтэнэригэр үбүнэн-харчынан көмөлөһөрүн учуоттаабыта. Эмсэҕэлээччи адвоката да, эмсэҕэлээччилэр да бу хадатаайыстыбаны утарбатахтара.
Вера МАКАРОВА, «Саха сирэ» хаһыат, edersaas.ru
Сүрүн хаартыска — ааптар түһэриитэ