Николай Матаннанов эбэтэр Петр Старостин бастыырын сарсыҥҥы биэтэк быһаарыа
Намнааҕы спорт былаһааккатыгар быыппастыгас быччыҥнаах, тоҥ иҥиирдээх эр бэртэрэ илин былдьаһаллар. Ким бастыҥын сарсыҥҥы күн быһаарыаҕа.
Национальнай многоборьеҕа кыттааччы хара баһаам. Хамаандалар уолаттарга, кыргыттарга, эр дьоҥҥо, дьахталларга диэн түөртүү киһилээхтэр. Хас бөлөх аайы 35-тии киһи биирдэ киирэн күрэхтэһэр. Тоҕо диэтэххэ, спорт бу көрүҥэр эрэ сүүмэрдээһин ыытыллыбатах буолан, хамаандалар бары спортсменнардаах кэлбиттэр.
Саамай хатыһыылаах киирсии, күүтүллүбүтүн курдук, эр дьон бөлөҕөр буола турар. Чурапчылар Дыгын оонньууларын кыайыылааҕа Петр Старостиннаах буоланнар, “көмүһү сиэптэригэр уктубут кэриэтэ” эрэммиттэрэ, халлаан сылыйдаҕына хаар уулларын курдук, түһүмэхтэн түһүмэх ахсын сүтэн-симэлийэн иһэр. Үс көрүҥ (тутум эргиир, үс төгүл үс, өһөс торбос) түмүгүнэн Николай Матаннанов (Дьокуускай) 15 бааллаах бастакы сылдьар. Петр Старостин киниттэн 10 “хараҕынан” хаалан, иккис көрдөрүүлээх. Тааһы көтөҕүүгэ Чурапчы чулуута иккис миэстэлэннэ эрээри, Матаннанов төрдүс көрдөрүүлэнэн, икки ардылара улаханнык кылгаабата. Онон сарсын 1 тыһ. миэтэрэҕэ сүүрүүгэ Николай лаппа хаалбатаҕына, чахчы-бааччы бастыыр туруктаах.
Манна сыһыаран эттэххэ, Үөһээ Бүлүү күүстээх уола Любомир Николаев тааһы көтөҕүүгэ кыахтаахтык кыайда гынан баран, үс бастакы көрүҥҥэ ортоһуордук кыттан, бириистээх миэстэҕэ тиксибэтэ илэ билиннэ.
Василий НИКИФОРОВ, «Саха сирэ» хаһыат, edersaas.ru
Ааптар хаартыскаҕа түһэриитигэр: Чурапчы чулуута Петр Старостин көмөлөһөөччүтэ, илбииһитэ Николай Слепцов-Сылыктыын.