Ил Дархан Айсен Николаев кулун тутар 24 күнүнээҕи 1069 №-дээх Ыйааҕынан Нерюнгритааҕы көтөр фабрикатын генеральнай дириэктэрэ Николай Иванов “Гражданскай килбиэн” бэлиэнэн наҕараадаламмыта.
Бу судаарыстыбаннай наҕарааданы Николай Сергеевич Алданнааҕы “Саха Өрөспүүбүлүкэтин спорт кыһыҥҥы көрүҥнэригэр бэлэмнэниигэ киин” тэрилтэ дириэктэринэн үлэлии сылдьан оҥорбут хорсун быһыытын иһин ылла.
Бу туһунан спорт суруналыыһа Петр Павлов “Саха сирэ” хаһыакка былырыын атырдьах ыйыгар суруйан турар.
2017 сыл сэтинньи 6 күнүгэр Алдан спортивнай баазатыгар саалаах дьон киирэн ытыалаабыттарын, Николай Сергеевич тутуталаан, хаан тохтуулаах иэдээн тахсыаҕын тохтоппутун туһунан истэн турардаахпын. Сэһэргэһээччим сэмэй муҥутаан, ол туһунан тугу да быктарбата.
Кэпсээбиттэринэн, бааза территориятын иһигэр киирэн дьону ытыалаабыттар. Саа тыаһын истэн, дириэктэр тута уолуйбакка хорсун быһаарыныы ылынан, тохтоторго сананар. Баазаҕа – омуктар, оҕолор дьарыктана сылдьаллар. Ол иһин, эппиэтинэһи өйдөөн, бэйэтэ тиийэн, ол дьону тохтотон, тутан киллэрэн, полицияҕа эрийэн, туттарбыт.
Николай Сергеевич Иванов хорсун холобурун мээнэ хаалларбакка, наҕараадаҕа түһэрэргэ бастаан Кытай Хай Люзянь провинцията, онтон РФ Судаарыстыбаннай Дуумата, РФ спорка министиэристибэтэ туһааннаах салайааччыларга суруктары ыыппыттар даҕаны, билиҥҥитэ туох да биллибэт чинчилээх. Ханныгын да иһин, кутталлаах балаһыанньа, өскөтүн кини туппатаҕа эбитэ буоллар, өссө туох буолара биллибэт.
Маныаха Николай Иванов эдэр сылдьан илиҥҥи дойдулар күөн көрсөр киирсиилэринэн утумнаахтык дьарыктаммыта туһалаабыт буолуохтаах дии саныыбын. Николай оҕо сылдьан Нөмүгүгэ, тустууга, Степан Заморщиков диэн уруккута биллиилээх бөҕөс салалтатынан дьарыктаммыт. Өрөспүүбүлүкэҕэ бэйэтин саастыылаахтарыгар иккитэ бастыы сылдьыбыт. Онтон аармыйаттан кэлэн баран, энтузиаст-тириэньэр Александр Куприяновка илиҥҥи дойдулар күөн көрсөр киирсиилэринэн дьарыктаммыт. Хапсаҕайга Саха сирин, кик-боксиҥҥа Арассыыйа спортарын маастара, тай-боксаҕа норуоттар икки ардыларынааҕы кылаастаах спорт маастара буолбута.
Петр ПАВЛОВ.
Хаартыскаҕа: Алданнааҕы хайыһар баазатын дириэктэрэ
Николай Сергеевич Иванов (хаҥаһа)
Хаҥалас улууһуттан Арассыыйа күрэхтэһиитин
бастакы призера, спорт маастара Дмитрий Егоровы кытта.
Николай ЕНОХОВ түһэриитэ.