Николай Харитонов: Саха сирэ хотугу таһаҕаһы таһыыга холобур буолар эрэгийиэн
Илиҥҥи экэнэмиичэскэй пуорумҥа «Хотугу таһаҕаһы таһыы: саҥа систиэмэ» диэн сессияҕа Судаарыстыбаннай Дуума Уһук Илин, Арктика сайдыытын кэмитиэтин бэрэссэдэтэлэ Николай Харитонов Саха сирэ хотугу таһаҕаһы таһыыга үтүө уопуттааҕын, бу уопутунан кини атыттарга холобур буоларын эттэ.
Николай Михайлович бу сессияҕа сокуон барылыгар үлэлэһэ сылдьар хамыыһыйаны кытары кэлэн кытынна.
— Саха сиригэр биһиги бу сайын хамыыһыйабыт көһө сылдьар мунньаҕын ыыппыппыт. Онно үгүс боппуруостары кэпсэтэн турабыт. Саха сирэ урут-уруккуттан кимтэн да тутуллубакка эрэ бэйэтин иһигэр хоту таһаҕаһы таһыыга анал быраабылалары, нуормалары ылынан үлэлии олорор. Бу үтүө уопут, манан кинилэр биһиэхэ холобур көрдөрөллөр. Сокуон барылын ылынар, мин санаабар, өссө да эрдэ. Ыксаабакка барытын сиһилии суруйуоҕуҥ, бастатан туран, манна ким эппиэттээх буолуохтааҕа чопчу быһаарыллыахтаах, — диэн этэр кини.
Сессияны Судаарыстыбаннай былааннааһын илиҥҥи киинин дириэктэрэ Михаил Кузнецов иилээн-саҕалаан ыытта. Кэпсэтиигэ Уһук Илин, Арктика сайдыыларын миниистирин бастакы солбуйааччы Гаджимагомед Гусейнов, Саха сирин Ил Дархана Айсен Николаев, Чукотка губернатора Роман Копин, «РусГидро» хампаанньа генеральнай дириэктэрин солбуйаачы Александр Чариков, «Росатом» хампаанньа Арктиканы кытары үлэлэһэр анал бэрэстэбиитэлэ Владимир Панов, Федерация Сэбиэтин федеративнай тутулга, эрэгийиэннэҕи бэлиитикэҕэ, олохтоох салайыныыга, Арктика боппуруостарыгар кэмитиэтин бэрэссэдээтэлэ Андрей Шевченко кытыннылар.
Аграфена КУЗЬМИНА