Култуура Маны аах

Николай Григорьев ыалга олоҥхолуу кэллэ

«Ыалга олоҥхолооһун» бырайыак сыл аайы олоҥхо декадатын былааныгар киллэриллэн, олоҥхону ыалга истии тэриллибитэ номнуо 9-с сылыгар барда.

Быйылгы ыалга олоҥхо «Ыалга олоҥхолооһун» бырайыак ааптара, СӨ култууратын үтүөлээх үлэһитэ Борис Михайлов Жатайдааҕы чааһынай дьэтигэр иһилиннэ. Дьиэлээхтэр, былыргы саха ыалын үгэһинэн, олоҥхоһут Николай Григорьевы  күндү ыалдьыт быһыытынан маанылаан көрүстүлэр, ас эгэлгэтин астаан, сандалы тула олордон, кэлбит ыалдьыттары күндүлээтилэр.
Олоҥхону дьиэҕэ истээри, олоҥхону тарҕатарга уонна олоҥхоһуттары өйүүргэ үлэлии-хамсыы сылдьар тустаах дьон кэлбиттэрэ икки бүк үөрүүлээх буолла. Ол курдук, Олоҥхо өрөспүүбүлүкэтээҕи киинин сүрүннүүр үлэһиттэрэ: П.А.Ойуунускай аатынан судаарыстыбаннай бириэмийэ лауреата Елена Николаевна Протодьяконова уонна СӨ култууратын үтүөлээх үлэһитэ Зоя Григорьевна Сысолятина ыҥырыллан кэллилэр. Кинилэр кыһыҥҥы хараҥаҕа хаайтарбакка, түүн үөһэ буолбутун билбэккэ олоҥхону истэ, сэҥээрэ олордулар. «Ноо…» диэн олоҥхо мүччүргэннээх сырыыларын кэмигэр 4 саастаах кырачаан сиэн Тимур эмиэ олоҥхону сэргээн иһиттэ, олоҥхоһут диэн күндү ыалдьыт буоларын көрөн сэҥээрдэ. Нөҥүө күнүгэр ыаллар, олоҥхоһукка махталларын биллэрэн, илии тутуурдаан, өттүк харалаан атаардылар.

Борис Михайлов-Айылҕан:
«Бу «Ыалга олоҥхолооһун» бырайыакпын номнуо тохсус төгүлүн ыал дьиэтигэр ыыттыбыт. Олоҥхо курдук камернай толоруу сыанаҕа эбэтэр атын киэҥ эйгэҕэ эрэ буолбакка, олоҥхо былыр былыргыттан иитиллэн кэлбит сиригэр -– ыал дьиэтигэр иһилиннин диэн маннык бырайыагы толкуйдаабытым. Ону дьон сэҥээрэн, иилэ хабан ылан, атын улуустарга эмиэ дьиэҕэ олоҥхолуур буолбуттарыттан сэмээр үөрэбин.
Быйыл Чурапчы Чакырыттан төрүттээх Николай Никитич Григорьев ыҥырыыбын ылынан, Жатайга чааһынай дьиэбитигэр Эрилик Эристиин «Буура Дохсун» олоҥхотун толорон иһитиннэрбитигэр чугас дьонум аатыттан махтанабын. Киһиэхэ ураты күүстээх дьайар олоҥхонон биһиги олорор дьиэбит салгынын, эйгэтин ырааһырта, күүспүтүгэр күүс, санаабытыгар санаа эптэ», -– диэн олоҥхоһукка Махтал суругун уонна бэлэҕин туттарда.

ЫСПЫРААПКА:
Николай Григорьев 2018 сыллаахха Алдан улууһугар Олоҥхо ыһыаҕар олоҥхоһуттар куонкурустарыгар кыайыылаах тахсан, Lada 4×4 Urban массыына хаһаайынынан буолбута.
Кини -– Чурапчы улууһун Чакыр сэлиэнньэтигэр «Байара» бааһынай хаһаайыстыба салайааччыта. Эдэр эрдэҕиттэн уус-уран самодеятельность көхтөөх кыттааччыта, өрөспүүбүлүкэҕэ биллэр олоҥхоһуттартан биирдэстэрэ, «Кылыһах» фольклор ансаамбылын кыттыылааҕа, дэгэрэҥ ырыатын толорооччу, тойуксут, сыана бэтэрээнэ, Чакыр нэһилиэгин бочуоттаах олохтооҕо.

Надежда ЕГОРОВА, «Саха сирэ», edersaas.ru

1
0