Маны аах Тыа хаһаайыстыбата

Николай Ефимов: “Бородууксуйабыт тута атыыга баран иһэр”

Дойдуга биллэриллибит санкциянан, экэниэмикэ боппуруоһунан олохтоох оҥорон таһаарыыга “Батамай” хаһаайыстыба (Ленскэй улууһа) дириэктэрэ Николай Ефимов санаатын үллэһиннэ.

edersaas.ru

— “Батамай” хаһаайыстыба сүөһү иитиитинэн уонна үүтү, эти оҥорон таһаарыынан дьарыктанар. Былырыын үүтү оҥорон таһfарар собуоту үлэҕэ киллэрбиппит. Онтубут күҥҥэ муҥутаан 10 туоннаҕа тиийэ үүтү оҥорон таһаарар кыахтаах. Биһиги бэйэбит эрэ хаһаайыстыбабыт үүтүн буолбакка, улуус хаһаайыстыбаларыттан үүтү тута олоробут. Билиҥҥитэ күн аайы 3 туонна үүтү оҥорон таһаарабыт.

Санкция биһиэхэ билиҥҥитэ улаханнык биллэ илик. Сайын ортотугар диэри оҥорон таһаарыахтаах бородууксуйабыт упаковкатын, саппаас чааспытын барытын ылан олоробут. Онуоха диэри олох-дьаһах оннун булан, тиэрдээччилэрбит баар гыныахтара дии саныыбыт.

Сыанабытын 2017 сылтан үрдэппэккэ олоробут. Бүгүҥҥү быһыы-майгы да инниттэн, кэлии үүт сыаната үрдээн барбытыгар, биһиги аспыт-үөлбүт атыыга хамаҕатык барар. Былырыыҥҥа диэри арыыны оҥорон таһаарар эбит буоллахпытына, быйыл үүппүт арыыга тиийбэт, тута үүтүнэн, кефиринэн, йогуртунан, сыырынан атыылыы турабыт.

Быйыл былааннаммыт 1400 туонна үүппүтүттэн, 1000 туоннаны бэйэбит хаһаайыстыбабыт, онтон атынын туора хаһаайыстыбалар туттарыахтаахтар. Бородууксуйабыт атыыга хамаҕатык барар, — диэн эттэ.

 

 

Людмила ПОПОВА, “Саха сирэ” хаһыат, edersaas.ru

1
0
Telegram @edersaas20