Бэлиитикэ Уопсастыба

Николай Бугаев: «Гуманитарнай көмө өссө да наада»

Саха сирин олохтоохторун Донецкай уонна Луганскай Өрөспүүбүлүкэлэргэ көмөлөрө салҕанар. Күһүҥҥү кэмҥэ бу эрэгийиэннэртэн кэлбит дьоҥҥо көмө өссө ордук наада буолар. Саха сирин Уопсастыбаннай балаатата дойдуга биир бастакынан Донбасстан кэлбит дьоҥҥо гуманитарнай көмөнү хомуйууну биллэрбитэ. Ол туһунан балаата бэрэссэдээтэлэ Николай Бугаев «Фактор Z» биэриигэ кэпсээтэ.

 

— Мин бэйэм бу өрөспүүбүлүкэлэргэ бара сылдьан, дьиэ-уот, суол-иис урусхалламмытын илэ харахпынан көрбүтүм. Украина былааһа соруйан электроннай базалары, биэнсийэлээхтэр испииһэктэрин суох гыммыттара, каарталарын үлэлээбэт оҥорбуттара. Дьон үлэтэ, харчыта суох хаалбыттара. Босхоломмут оройуоннарга сыыйа олох чөлүгэр түһэр. Ол да үрдүнэн сорохтор гуманитарнай көмө суотугар эрэ олороллор. Онон бу көмө тохтоон хаалбата суолталаах, — диэн кини эттэ.

Анал эпэрээссийэ саҕаланыаҕыттан Арассыыйаҕа тыһыынчанан киһи куотан кэлбитэ. Николай Бугаев этэринэн, дьону Арассыыйаҕа күүстэринэн илдьэллэр диэн тарҕатар информациялара сымыйа. Дьиҥинэн, дьон Украинаҕа да барар кыахтаах. Варшаваҕа, Киевкэ, Москваҕа диэри Донецкайтан оптуобустар сылдьаллар. Онон дьон бэйэлэрэ баҕа өттүлэринэн, ханна баралларын талаллар.

Социологическай ыйытыктар көрдөрөллөрүнэн, Арассыыйа, чуолаан Саха сирин олохтоохторун өйөбүллэрэ, патриотическай өйдөрө-санаалара үрдүк. Өрөспүүбүлүкэ волонтердара, ыччат түмсүүлэрэ гуманитарнай миссиянан Мариупольга, Кировскайга бара сылдьыбыттара.

Донецкай, Луганскай Өрөспүүбүлүкэлэртэн кэлбит дьоҥҥо гуманитарнай көмөнү хомуйар пуун Дьокуускайга Орджоникидзе уулуссатын 10 №-дээх дьиэтигэр, 2-с этээскэ аактабай саалаҕа баар.

Ангелина Васильева, “Саха сирэ” хаһыат, edersaas.ru

Хаартыска: СИА.

0
0
Telegram Whatsapp