Николай Барамыгин: Бэрэсидьиэн этиититтэн Илин Азия дойдуларын кытта бииргэ үлэлээһиҥҥэ идеялары кэтэһэбин

Саха сирин Уопсастыбаннай палататын чилиэнэ, “Россия-Япония” уопсастыба регионнааҕы салаатын бэрэссэдээтэлэ Николай Барамыгин СИА-ҕа биэрбит комментарийыгар РФ Бэрэсидьиэнин Федеральнай Мунньахха Анал этиититтэн Илин Азия дойдуларын кытта сыһыаннаһыыны салгыы тупсарыыга бииргэ үлэлээһиҥҥэ этиилэри кэтэһэрин туһунан эттэ.

“Миэхэ, международник уонна Илиҥҥи дойдулары үөрэтэр киһиэхэ, Россия Илин диэки хайыһар үлэтин салгыыра улахан суолталаах. Ол иһин РФ бэрэсидьиэнин сыл аайы оҥорор Анал этиититтэн Илиҥҥи Азия дойдуларын, чуолаан, Японияны кытта сыһыаны тупсарыыга сонун санаалары кэтэһэбин”, — диэн бэлиэтээтэ Николай Барамыгин.

Кини этэринэн, билиҥҥи туругунан бу өттүгэр үтүө өттүгэр хамсааһын баар. “Аан дойду иккис  сэриитэ түмүктэниэҕиттэн 73 сыл ааста. Дойду бэрэсидьиэнэ Владимир Путин уонна Япония премьер-миниистирэ Синдзо Абэ көрсүһүүлэриттэн сылыктаатахха, эйэлээх дуогабары түһэрсэр туһунан боппуруоска туочука туруорар кэм тосхойдо. Маны мин өйүүбүн. “Илин Сибиир — Чуумпу акыйаан” турба тиһигин тутууну, АТР дойдуларыгар Саха сириттэн уонна Иркутскай уобалаһыттан айылҕа гааһын тиэрдиигэ анаммыт “Сибиир күүһэ” гаас ситимин салгыы тардыыны бэлиэтиир тоҕоостоох”, — диэтэ уопсастыбаннай палата чилиэнэ.

Кини этэринэн, 2016 сыл ахсынньы ыйыгар Россия Японияны кытта 70 тахса сөбүлэһиигэ илии баттаспыта, итинтэн 8-һа Саха сирин сиригэр-уотугар ыытыллар бырайыактарга анаммыта.

Санатан эттэххэ, РФ бэрэсидьиэнэ Владимир Путин Федеральнай Мунньахха Анал этиитин кулун тутар 1 күнүгэр истиэхпит.

edersaas.ru