Нам музыкальнай оскуолата 1960 сыллаахха аһыллан, ситиһиилээхтик үлэлии турар. Үөрэнээччитин ахсаана элбэҕинэн, оҕолор бүтэрэн үөрэхтэрин салҕыылларынан, ыытыллар араас куонкурустарга миэстэлэһэллэринэн, өрөспүүбүлүкэҕэ биллэр-көстөр, үөрэх ирдэбилигэр эппиэттиир кыһалартан биирдэстэринэн буолар.
edersaas.ru
Кэргэним Николай Николаевич Атласов Нам улууһун Таастаах нэһилиэгэр элбэх оҕолоох ыалга бастакы оҕонон төрөөбүтэ. Кыра оҕо сылдьан муусукаҕа дьулуурдааҕын бэлиэтии көрөн, аҕата гармошка ылан биэрбит.
Николай Хабаровскайдааҕы Култуура институтун үөрэнэн бүтэрэн, дойдутугар бастаан Хатырык музыкальнай оскуолатыгар дириэктэринэн уонна баян кылааһын учууталынан саҕалаабыта. Оҕолортон састааптаах норуодунай оркестры тэрийбитэ, салайбыта. Нэһилиэккэ, оройуоҥҥа, ону ааһан Мэҥэ Хаҥалас Павловскайыгар, Аммаҕа, Дьокуускайга ахсаана биллибэт элбэх куонкурустарга, бэстибээллэргэ кытталлара. Куруутун лауреат, дипломант аатын ылан, кыайар-хотор этилэр. Икки төгүл Саха араадьыйатын фондатыгар уһуллубуттара.
Нэһилиэк ыччатын мунньан, нуучча норуодунай оркестрын уонна ол саҕана күөдьүйбүт ВИА (вокальнай-инструментальнай ансаамбыл) тэрийбитэ. Оскуоланан, кулуубунан муусука ньиргийэн олорор кэмэ этэ.
1986 сылтан Нам музыкальнай оскуолатыгар учууталлаабыта, дириэктэринэн үлэлээбитэ. Улахан кэлэктииби салайан, улуус тэрилтэлэрин кытта ыкса үлэлээн, оскуоланы бары өттүттэн сайыннарбыта. Нам преподавателлэриттэн тэриллибит нуучча норуодунай оркестрын салгыы дьарыктаабыта. Репертуары бэйэтэ аранжировкалыыра, “Бастыҥ иструментовщик” аатын иҥэрбиттэрэ. Олус эппиэтинэстээхтик сыһыаннаһара, бэйэтэ көҕүлээн, үрдүк таһымҥа таһааран, Челябинскай куоракка ыытыллыбыт Бүтүн Арассыыйатааҕы куонкуруска кыттан, дипломант аатын ылбыттара.
1997 сылга Култуура министиэристибэтэ Николай Николаевиһы, Арассыыйа миниистирдэрэ, миниистирдэри солбуйааччылар таһымнаах улахан сэминээргэ Париж куоракка ыыппыта. Онно кини Василий Афанасьевич Босиковтыын Саха сириттэн иккиэ буолан кыттыбыттара. Үлэтин үчүгэйдик билэрэ, исписэлиис быһыытынан үрдүктүк сыаналанара, ытыктанара. Бэйэтэ үлэтиттэн улахан дуоһуйууну ылара.
2018 сыл кулун тутарыгар Намнааҕы Оҕо музыкальнай оскуолата, чуолаан норуодунай отделение көҕүлээһининэн, Николай Атласов кэриэһигэр төрдүс төгүлүн баянистар, аккордионистар куонкурустарын тэрийэн ыытта. Бастакы куонкурустар зональнай эбит буоллахтарына, бу сырыыга өрөспүүбүлүкэ таһымнаах буолла. Уонна өссө ансаамбыллар, оркестрдар эбилиннилэр. Оройуон кулуубугар, киэҥ сиргэ ыытылынна. Покровскай, Бэрдьигэстээх, Майа, Аллараа Бэстээх, Амма, Таатта, Дьокуускай куорат, Нам оҕолоро уонна преподавателлэрэ кэлэн кытыннылар, күрэхтэстилэр. Барыта холбоон сүүстэн тахса кыттааччы кииристэ, олус үрдүк таһымнаахтык ааста. Куонкуруһу Дьокуускайдааҕы музыкальнай колледж, Арктическай институт учууталлара дьүүллээтилэр.
Кыайыылаахтар лауреат, дипломант үрдүк аатын сүгэн, бэлэх тутан, үөрэн-көтөн тарҕастылар.
Биһиги аҕабыт аатын үйэтитэн, куонкуруһу тэрийэн ыыппыт Намнааҕы Оҕо музыкальнай оскуолатын администрациятыгар, кэлэктиибигэр, улуустааҕы култуура салаатыгар, спонсордарга уонна бары кыттааччыларга, дьиэ кэргэним аатыттан барҕа махталбын тиэрдэбин.
Кэргэнэ Зинаида Атласова.