Нерюнгритээҕи ГРЭС сууккаҕа 3,5 тыһыынча туонна таас чоххо наадыйар буоллаҕына, бүгүҥҥү туругунан 108 тыһ. туонна таас чох бородууксуйатын саппааһа баар, ол ый саҕаланыытынааҕар 78 тыһ. туоннанан элбэх. Ыстаансыйа туруктаахтык үлэлиир. Бу туһунан өрөспүүбүлүкэ Бырабыыталыстыбатын Бэрэссэдээтэлэ Андрей Тарасенко таас чох бырамыысыланнаһын тэрилтэлэрин уонна биэдэмистибэлэри кытта ыыппыт мунньаҕар эттэ.
Санатан эттэхэ, олунньу ый бүтүүтэ Нерюнгритээҕи ГРЭС-и таас чоҕунан хааччыйар “Денисовскайдааҕы” шахтаҕа сир хамсааһына буолбута. Үс учаастакка технологическай үлэ тохтотуллубута. Таас чоҕу тиэйии ыытыллыбыта эрээри, бу ГРЭС үлэтин хааччыйарга татым этэ. Ол иһин чөлүгэр түһэрэр үлэлэр кэмнэригэр ыстаансыйаҕа таас чоҕу “Якутуголь” тиэйбитэ. “Якутуголь” тиэйиини кэмигэр ыытан, балаһыанньа туруктаах буолла. Ону тэҥэ ыстаансыйа куттала суох үлэтин хааччыйарга Госрезервэ 49 тыһ туонна кээмэйдээх саппааһа баар.
ФАС кытта тарыыбы сүрүннүөхтэрэ, туһанааччыларга сыананы таһаарбат туһуттан.
Бу сир хамсааһына буолар кыахтаах зоната, ол иһин шахта үлэтин чөлүгэр түһэрии болдьоҕун научнай өттүнэн чинчийэн уонна шахтаны куттала суох турукка киллэрэн баран быһаарыахтара. Бу нэдиэлэҕэ онно Хайа геомеханикатын уонна маркшейдерскай дьыала научнай-чинчийэр институтун – ВНИМИ салаалар икки ардыларынааҕы научнай киинин исписэлиистэрэ үлэлииллэр.
Бу иннинэ вице-премьер – РФ Бэрэсидьиэнин УИФУо боломуочуйалаах бэрэстэбиитэлэ Юрий Трутнев Дьокуускайга энергетическэй комплекс сайдыытын боппуруостарыгар сүбэ мунньах ыыппыта. Кини федеральнай министиэристибэлэргэ уонна биэдэмистибэлэргэ Нерюнгритээҕи ГРЭС таас чоҕунан хааччыйыы механизмын торумнуурга соруйбута. РФ Энергетикаҕа министиэристибэтэ ФАС кытта сыананы сүрүннүүллэрэ ирдэнэр.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова
Хаартыска: тустаах саайтан