СӨ Ил Дархана Айсен Николаев тохсунньу 28 күнүгэр Нерюнгри оройуонугар сырытта.
edersaas.ru
Ил Дархан оробуочай сырыытын кэмигэр Нерюнгри оройуонугар доруобуйа харыстабылын сайыннарыы бырагырааматын чэрчитинэн 2022 сылга диэри 1 млрд 700 мөл. солкуобай суумалаах үп бэриллиэҕин туһунан иһитиннэрдэ. Бу үп эмтиир тэрилтэлэри олохтоохтук өрөмүөннүүргэ, үрдүк технологиялаах медицинскэй тэриллэри атыылаһарга, материальнай уонна техническэй сэбилэниигэ, каадырынан хааччыллыыга туһаныллыахтаах. Ол иһигэр, гериатрия, паллиативнай көмө, гастроэнтерология курдук хайысхалары сайыннарыы былааннанар. Оройуоннааҕы балыыһаҕа амбулаторнай хирургия киинэ уонна онкология амбулаторнай көмөтүн отделениета аһыллыахтара.
Айсен Николаев бэлиэтээбитинэн, Нерюнгри оройуонун олохтоохторуттан киирбит этиилэр, суруктар 90 бырыһыаннара эмтээһин хаачыстыбата намыһаҕын бэлиэтииллэр.
“Нерюнгри куоракка улахан дьон поликлиникатыгар эмтэнэ кэлээччилэри хайдах усулуобуйаҕа көрсөллөрүн, быраастар үлэлииллэрин көрдүм. Нэһилиэнньэтин ахсаанынан өрөспүүбүлүкэҕэ иккис миэстэҕэ сылдьар куорат доруобуйатын харыстабылын хаачыстыбата арыый үрдүк буолуохтааҕа. Хомойуох иһин, билигин хаачыстыба ортоттон намыһаҕынан сыаналанар”, — диэн Ил Дархан Соҕуруу Саха сирин доруобуйатын харыстабылын сайыннарыы бырагырааматын чугастааҕы кэмҥэ бигэргэтиигэ киллэрэллэригэр сорудахтаата.
Надежда ЕГОРОВА, “Саха сирэ” edersaas.ru