Коронавирус дьаҥар төһө киһи хаптарда?
Бүгүн хамсыгы утары охсуһар өрөспүүбүлүкэтээҕи суһал ыстаап салайааччытын солбуйааччы Ольга Балабкина брифинэ буолла. Ольга Валерьевна сүрүн болҕомтону ахсынньы ыйга үктэммиппитинэн, Саҥа дьыл чугаһаабытынан бу бырааһынньыгы көрсүүгэ сыһыаннаах боппуруоска тохтоото. Кини Ил Дархан ыйааҕынан 15-20 элбэх киһилээх маассабай тэрээһиннэр ыытыллаллара бобуллубутун санатта. Анал идэтийбит тэрилтэлэргэ ыытар да буоллахха, СӨ Ил Дарханын уонна Роспотребнадзор Саха сиринээҕи управлениетын бары ирдэбиллэрин кытаанахтык тутуһуллуохтааҕын чорботон бэлиэтээтэ.
Оттон бу ахсынньы 3 күнүнээҕи туругунан, ааспыт сууккаҕа 214 киһи ыалдьыбыта биллибит. Киин куораппытыгар – 110 киһи хоруона хамсыгар хаптарбыт. Элбэх киһи (уоннуу-уон биирдии) Нерюнгригэ, Алдаҥҥа, Мииринэйгэ ыалдьыбыта чопчуламмыт. Горнай улууһугар төһө да сэрэтэр үлэ, бары ирдэбиллэр күүскэ ыытыллыбыттарын үрдүнэн, бу хайысхаҕа үлэни өссө күүһүрдэргэ О.Балабкина эттэ. Бу улууска көрдөрүү аччаабат – 8. Атын 18 оройуоҥҥа биэстэн бииргэ диэри киһи дьаҥҥа хаптарбыт. ПЦР 3704 анаалыһа оҥоһуллубут.
Быһата, балаһыанньа итинник. Сэрэтэр үлэ, харыстанар миэрэлэр өссө күүһүрэллэрэ наадата көһүннэ Ольга Валерьевна иһитиннэриититтэн.
Мааската кэтиҥ, харыстаныҥ!
Женни Стрюкова бэлэмнээтэ
Хаартыска: интэриниэттэн