Нерюнгрига оҕо поликлиниката аныгы үйэ ирдэбилигэр толору эппиэттиир кыахтаныа

Ааптар: 
Бөлөххө киир:

Нерюнгрига оҕо поликлиниката аныгы үйэ ирдэбилигэр толору эппиэттиир кыахтаныа.

Бүгүн, бэс ыйын 27 күнүгэр, Ил Дархан Айсен Николаев оробуочай сырыытыгар, Нерюнгритааҕы киин балыыһаҕа оҕо поликлиникатыгар сырытта.

Нерюнгритааҕы киин балыыһа кылаабынай бырааһа Алексей Яворскай СӨ Доруобуйа харыстабылыгар миниистир Елена Борисованы кытары Ил Дархаҥҥа поликлиникаҕа хапытаалынай өрөмүөнү көрдөрдүлэр. Манна 2019 сыл ыам ыйыттан үлэ саҕаламмыт. Бастакы кэрдииһэ быйыл ахсынньыга бүтүөхтээх.

Санатан эттэххэ, Нерюнгрига оҕо поликлиникатыгар өрөмүөн үлэтэ, Ил Дархан Айсен Николаев 2018 сыл бэс ыйын 25 күнүгэр таһаарбыт  489-РГ  №-дээх «О Плане социального развития центров экономического роста Республики Саха (Якутия)» дьаһалыгар олоҕуран ыытыллар.

«Кэлиҥҥи сылларга Нерюнгрига доруобуйа харыстабылын боппуруоһа сытыытык турбута. Онон оҕо доруобуйатыгар болҕомтону күүһүрдүүттэн үлэ саҕаламмыта. Билигин бу поликлиника саҥалыы уларытан оҥоһуллуута түмүктэнэр кэрдииһигэр тиийдэ. Сыл бүтүүтүгэр, манна чахчыоҕолорго  дьоһуннаах мэдиссиинэ көмөтүн оҥорор саҥа миэбэллээх, мэдиссиинэ тэриллэрдээх олус үчүгэй эбийиэк үлэҕэ киириэҕэр эрэнэбин«, — диэтэ Айсен Николаев.

Өрөмүөн бастакы кэрдииһигэр 105,9 мөл солк. үп көрүллүбүт. Үлэ чэрчитинэн, муостатын халтараана суох матырыйаалынан оҥороллор, стеклопакет түннүктэр туруоруллаллар, ис уонна тас ааннар уларытыллаллар, итиини биэрэр тиһик, уот-күөс, канализация, уу тиһигэ, барыта саҥардыллар.

Маны таһынан, эбии үлэҕэ (иккис кэрдиискэ) 71, 6 мөл.солк. суума көрүллүбүт. Онно дьоҥҥо тупсаҕай сир, оҕо оонньуур былаһаакката, аһаҕас регистратура, электроннай уочарат, сирин-уотун тупсарыы үлэлэрэ, күрүөтэ-хаһаата, уота-күөһэ, оҕо оонньуур былаһаакката, технологическай тэриллэр, мэдиссиинэ миэбэлэ, тэрилэ киллэриллэллэр.

Елена Борисова иһитиннэрбитинэн, СӨ Доруобуйа харыстабылын министиэристибэтинэн Нерюнгритааҕы оҕо поликлиникатыгар 30 мөл.солк.суумаҕа  отоларингологтар, офтальмологтар, эмтиир-чэбдигирдэр физкультура кабинеттарыгар, о.д.а. УЗИ аппарааттара, фиброскоптар, лоркомбайннар, риноларингофиброскоптар, офтальмогтар туттар тэриллэрэ, о.д.а. ылыллыбыттар. Министиэристибэ исписэлиистэргэ аллергология уонна иммунология, гастроэнтерология, кардиология хайысхаларынан саҥалыы профессиональнай бэлэмнэниини тэрийэн ыыппыт. Эбии үөрэхтээһини оҕо хирурдара уонна урологтара барбыттар.

Онон үлэ түмүктэннэҕинэ, оҕо поликлиникатыгар урут суох мэдиссиинэ өҥөтүн оҥорор саҥа кабинеттар арыллаллара былааннанар. Аллергология уонна иммунология, гастроэнтерология, кардиология, фиброгастроскопия кабинеттара баар буолуохтара. Ону сэргэ, стоматологическай поликлиникаттан оҕо стоматологиятын отделениета кэлэн үлэлиэҕэ.

«Коронавирус сыстыганнаах дьаҥа чэгиэн уонна мөлтөх доруобуйалаах оҕолору көрүүгэ, анаалыстары ылыыга, поликлиника иһигэр сылдьарга маршруту оҥорууга усулуобуйаны тэрийии, бу бириэмэ ирдэбилэ буоларын чопчу көрдөрдө, — диэтэ Айсен Николаев.

СӨ Ил Дархан уонна СӨ Бырабыыталыстыба пресс-сулууспата

Андрей Сорокин хаартыскаҕа түһэриилэрэ

+1
0
+1
0
+1
0
+1
0
+1
0
+1
0
+1
0