Былыр да, быйыл да күнүүлээһинтэн сылтаан араас буруй тахсар. Кырбааһынтан саҕалаан, өлөрүүгэ тиийэ. Оттон Нерюнгри куоракка туох буолбутун РФ Силиэстийэлиир кэмитиэтин Саха сиринээҕи управлениета иһитиннэрдэ.
Вера МАКАРОВА, «Саха сирэ» хаһыат, edersaas.ru
Бу куоракка 21 саастаах уол таптыыр кыыһын колледж 17 саастаах устудьуонугар күнүүлээн, кинилиин быһаарсарга санаммыт. Онуоха табаарыһын ыҥыран, арыгы иһэн баран, кулун тутар 20 күнүгэр киэһэ хойут ол уолга дьиэтигэр тиийбиттэр.
Уолу «кэпсэтиэххэ» диэн ыҥыран таһааран, массыынаҕа олордубуттар. Массыынаҕа олороотун, кырбаан-охсуолаан киирэн барбыттар. Онтон салгыы аны Чульман бөһүөлэгин диэки айаннаан, суол кытыытыгар тиийэн тохтоон, устудьуону массыынаттан таһааран, өссө кырбаабыттар.
Хайа эрэ түгэҥҥэ уол мүччү туттаран, куотан, саһан хаалбытын бу урдустар булбаккалар, баран хаалбыттар. Кырбаммыт уол ааһар массыынаны тохтотон, балыыһаҕа бэйэтэ тиийбит. Быраастар тута полицияҕа биллэрбиттэр.
Бу уолаттарга силиэстийэ уорганнара РФ Холуобунай кодексатын 126-с ыст. 2-с чааһын «в» пуунунан холуобунай дьыала тэрийдилэр. Ол эбэтэр, киһи олоҕор уонна доруобуйатыгар кутталлаах күүһү туттан туран, киһини уоруу бэлиэтэ баарынан.
Эмсэҕэлээбит уол туох эчэйиилэри ылбытын экспертиза быһаарыа: кырбаммытын ааһан, уол илиилэрин-атахтарын үлүппүт, билигин балыыһаҕа сытар.
Оттон уорбаланааччылары сотору кэминэн оперативниктар туппуттар. Буруйдарын билинэр көрдөрүүнү биэрбиттэр.
Силиэстийэ салҕанар.
Вера МАКАРОВА, «Саха сирэ» хаһыат, edersaas.ru
Хаартыска: интернеттэн.