Нерюнгрига Айсен Николаев вице-премьер Марат Хуснуллины кытары көрүстэ
Нерюнгрига Ил дархан Айсен Николаев Арассыыйа Федерациятын Бырабыыталыстыбатын бэрэссэдээтэлин солбуйааччы Марат Хуснуллины кытары көрүстэ.
edersaas.ru
Ол туһунан Айсен Николаев соцситимнэргэ суруйда.
– Бэҕэһээ киэһэ Нерюнгрига Арассыыйа Федерациятын Бырабыыталыстыбатын бэрэссэдээтэлин солбуйааччы Марат Хуснуллин, тырааныспар миниистирэ Виталий Савельев, «Арассыыйа тимир суоллара» хампаанньа генеральнай дириэктэрэ Олег Белозеров уонна тырааныспар салаатын биэдэмистибэлэрин эппиэттээх салайааччылара сырыттылар, – диэтэ Ил Дархан бэйэтин Instagram ситимигэр.
Көрсүһүүгэ Саха Өрөспүүбүлүкэтин сиригэр-уотугар БАМ Илиҥҥи полигонун сайдыытын, аэропортары саҥардыы, ол иһигэр бастатан туран, Нерюнгри куорат аэропордун сөргүтүү итиэннэ Дьокуускайга, Нерюнгрига саҥа кыбаарталлары тутуу боппуруостара таарыйылынна.
– Марат Шакирзяновичка биһиги этиилэрбитин мэлдьи өйүүрүн иһин махтанабын! – диэн Айсен Николаев махталын биллэрэр диэн Ил Дархан уонна Бырабыыталыстыба пресс-сулууспата иһитиннэрдэ.
Раиса Сибирякова, «Саха сирэ» edersaas.ru