“Колмар” хампаанньа Нерюнгрига өссө биир улахан тутуутун саҕалаата. Кини бу бырайыагынан аны үс сылынан Россияҕа, ону ааһан тас дойдуга коксаланар таас чоҕу батарыыга инники күөҥҥэ тахсыахтаах.
Бу күннэргэ Москваҕа буолбут Уһук Илин регионнар күннэрин чэрчилэринэн, РФ бырабыыталыстыбатын бэрэссэдээтэлэ Дмитрий Медведев салайааччылаах мунньах буолан ааста. Онно Ил Дархан Егор Борисов кытынна. Мунньах кэмигэр Дмитрий Анатольевич Уһук Илин регионнарга ураты бырайыактар олоххо киирэн, дойду сайдыытыгар улахан олук ууруллан эрэрин бэлиэтээн туран, быһа эфирынан видеоконференция нөҥүө Саха сиригэр уонна Хабаровскайга промышленнай саҥа эбийиэктэр тутуулара саҕаламмыттарын биллэрдэ.
Бастакынан Нерюнгрины кытары быһа сибээскэ тахсан, Инаглинскайдааҕы хайа байытар кэмбинээт тутуутун туһунан кэпсэттэ. Санатан эттэххэ, “Колмар” хампаанньа “Соҕуруу Саха сирэ” урутаан сайдар сир резиденинэн киирэн, үс улахан бырайыагы олоххо киллэриэхтээх. Хампаанньа аҕыйах сыл иһигэр 2 мөл. тоннаны таҥастыыр фабриканы, шахталары тутан номнуо үлэлэтэ турар. Билигин Денисовскайдааҕы хайа байытар фабриканы тутан бүтэрэн эрэр. Аны икки ыйынан толору күүһүнэн үлэлэтэр былааннаахтар. Бу фабрика сылга 6 мөл. тонна чоҕу таҥастыахтаах.
Хампаанньа генеральнай дириэктэрэ Сергей Цивилев бэлиэтииринэн, үһүс саҥа фабрика сылга 10 мөл. тонна чоҕу таҥастыахтаах. Үбүлээһинэ 62,5 млрд солк. тэҥнэһэр. Манна 3000 үлэ миэстэтэ тахсыахтаах. “Бу бырайыактарбытынан аны үс сылынан 20 мөл. тоннаҕа тахсар былааннаахпыт. Коксаланар чоҕу оҥорон таһаарыыга, Азия, Тиихэй акыйаан дойдуларыгар батарыыга Россияҕа инники күөҥҥэ тахсар соруктаахпыт”, — диэн иһитиннэрэр кини.
Ил Дархан Егор Борисов мунньах кэмигэр: “Биһиги өрөспүүбүлүкэбитигэр, Уһук Илин регионнарга бу маннык улахан бырайыактар саҕаламмыттарынан киэн туттабыт. Уонча сыллааҕыта РФ президенэ Владимир Путин көмөтүнэн өрөспүүбүлүкэ оҥорон таһаарыытын стратегическэй схемата оҥоһуллубута. Ити үлэ түмүгэ бу билигин көстөн эрэр. Төһө да кыһалҕалар баалларын үрдүнэн, Саха сиригэр промышленность иннин хоту айаннаан иһэр. Бу таас чоҕу хостооһуҥҥа, таҥастааһыҥҥа эрэ буолбакка, атын хайысхаларга эмиэ сыһыаннаах”, — диэн иһитиннэрдэ.
Инаглинскайдааҕы фабриканы таһынан Хабаровскайга “Азия лес” хампаанньа профилированнай пиломатырыйааллары оҥорон таһаарар сыаҕын тутуута саҕаланна. Манна 9,4 млрд солк. инвестиция угуллуохтаах. 690 үлэ саҥа миэстэтэ тахсыахтаах. Ону сэргэ оҕуруот аһынан дьарыктанар “Джей Джи Си Эвергрин” хампаанньа теплицаларын тутуутун иккис уочаратын саҕалаата. Хампаанньа 10 гектар сабыылаах сиргэ оҕуруот аһын үүннэриэхтээх. Манна 1 млрд солк. ороскуоттуур, 114 үлэ миэстэтин таһаарар былааннаах.
Ыспыраапка: РФ бырабыыталыстыбатын үбүлээһининэн Уһук Илин регионнарга, тутулла сылдьар бырайыактары ааҕан туран, барыта 80 эбийиэк үлэҕэ киириэхтээх. Былаан быһыытынан, манна барытыгар 120 млрд солк. инвестиция көрүллүөхтээх, 6700 үлэ миэстэтэ тахсыахтаах.
Аграфена КУЗЬМИНА, “Саха сирэ” хаһыат, edersaas.ru.