“Саха сирин соҕуруу өттө” урутаан сайдыы территориятыгар үлэ отут үс көрүҥүнэн дьарыктаныахтара.
Роман Попов, www.edersaas.ru
Саха Өрөспүүбүлүкэтигэр “Нерюнгри улууһа” муниципальнай тэриллии сиригэр-уотугар “Саха сирин соҕуруу өттө” урутаан сайдыы территорията тэриллэр.
Бу туһунан дьаһалга Арассыыйа бырабыыталыстыбатын бэрэссэдээтэлэ Дмитрий Медведев 2016 сыл ахсынньы 28 күнүгэр илии баттаабыта.
Докумуоҥҥа ыйылларынан, урутаан сайдыы сиригэр үлэлиэн баҕалаахтар кыччаабыта 500 000 солкуобай суумалаах капитальнай угууну оҥоруохтаахтар. Онно Евразийскай экономическай сойуус быраабынан олохтоммут таможня көҥүл балаһата туттуллуо. Бырабыыталыстыба дьаһалыгар урутаан сайдыы территориятыгар инженернэй, транспорт инфраструктуратын тутуу бүддьүөт тас өттүттэн үбүлэниэҕэ ыйыллар.
Дьаһал сыһыарыытыгар “Саха сирин соҕуруу өттө” урутаан сайдыы территориятыгар Бүттүүн Арассыыйатааҕы классификаторга олоҕуран үлэ ханнык көрүҥүнэн дьарыктаныахха сөбө ыйылынна. Онон Нерюнгри улууһугар тэриллэр саҥа урутаан сайдыы территориятыгар таас чоҕу хостооһунтан, химия эттиктэрин, бородууксуйаларын оҥорууттан доруобуйа харыстабылын, спорт эйгэтигэр үлэҕэ-хамнаска, сынньалаҥы тэрийиигэ тиийэ, барыта 33 үлэ көрүҥүнэн дьарыктаныахтара.
Арассыыйа Уһук Илини сайыннарыыга министиэристибэтин сыанабылынан, “Саха сирин соҕуруу өттө” урутаан сайдыы территориятыгар инвестиция бырайыактарын олоххо киллэриинэн 2,9 тыһыынча үлэ саҥа миэстэтэ таһаарыллыаҕа, 2025 сылга диэри нолуоктан бүддьүөт бары таһымыгар 21,4 млрд солкуобай киллэриллиэҕэ, инвестордарга 24,4 млрд солкуобай суумалаах нолуокка чэпчэтии көрүллүөҕэ.