Нерюнгри урбаанньыттара биисинэс-инкубатор уонна «Мин биисинэһим» туһунан
Нерюнгри оройуонун урбаанньыттара «Мин биисинэһим» кииҥҥэ судаарыстыба оҥорор өйөбүлүнэн туһаналлар. Манна 2009 сыллаахха биисинэс-инкубатор аһыллыбыта. Оттон билигин киин нөҥүө урбаанньыттар судаарыстыба, оройуон, институттар өйөбүллэринэн туһанар кыахтаахтарын туһунан СӨ Урбаан министиэристибэтин саайтыгар суруллар.
—-Урбаанньыттары, үлэтэ суох дьону, ыччаты өйүүр сыаллаах биисинэс-инкубатор тэриллибитэ. 2019 сыл бүтүүтүгэр бу биисинэс-инкубатор баазатыгар «Мин биисинэһим» киин өҥөнү оҥорор киинэ аһыллыбыта, — диэн Нерюнгрига «Биисинэс-инкубатор» ОП «Мин биисинэһим» Киин» САТ салайар Николай Кузнецов иһитиннэрбит, үлэни-хамнаһы сырдаппыт.
2021 сылтан «Мин биисинэһим» нөҥүө кииҥҥэ туһалаах иһитиннэрэр-сүбэлиир үлэлэр, тиэмэнэн вебинардар, быһа сибээстэр, дьыалабыай тэрээһиннэр тиһиктээхтик салҕаналлар, урбаанньыттар эрэгийиэннэр икки ардыларынааҕы быыстапкаларга кыттыылара тэриллэр. Биэс сүүстэн тахса тус сүбэ-ама оҥоһуллубут, резиденнэри аахпакка туран, 155 киһи кыттыылаах 15 тэрээһин ыытыллыбыт.
—Сыл анараа өртүгэр бэйэм дьыалабын арыйар туһунан толкуйга киирбитим. Билэр дьонум биисинэс-инкубаторга тиийэрбэр сүбэлээбиттэрэ. Онно «Мин биисинэһим» киин көмөтүнэн нолуок эрэсиимин туһунан сүбэ-ама ылбытым, бары боппуруостарга исписэлиис көмөлөспүтэ, ИП быһыытынан регистраияцлаабыта. Салгыы управляющайга бырайыакпын билиһиннэрбитим, онуоха резидеҥҥэ куонкуруска кыттарга этии киирбитэ. Куонкуруска кыайдахха туһата элбэх. Барыта этэҥҥэ буоллар ханнык диэн баҕарабын.
«Мин биисинэһим» уонна биисинэс-инкубатор оҥорор өҥөлөрө олус наадалаах. Бэлэм офиһы чэпчэтиилээх куортамҥа ылыы үлэтин саҥа саҕалыыр урбаанньыкка улахан өйөбүл. Урбаанньыт бириэмэтин бараабакка эрэ биир түннүккэ кэлим өҥөнү ылар, өйөбүллэр тустарынан сиһилии билэр, үөрэтэр араас бырагыраамаларга кыттар, о.д.а.элбэх«, — диир урбаанньыт Павел Паркачев.
Биисинэс-инкубатор быраграаматыгар резиденнэр бырайыактарын сыҕарытыы, арыаллааһын, эспиэрдэри тардыы, сүбэ-ама, ону сэргэ үөрэтэр тэрээһиннэргэ босхо сылдьыы бааллар.
— Биисинэс-инкубатор уонна «Мин биисинэһим» киин туһунан дьон сырдатарын элбэҕи истибитим. Онон «Үөрэнэр киин» арыйдахпына, хайаан да биисинэс-инкубаторга үлэлэппит киһи диэн баҕарбытым. Билигин мин бу киинтэн сүбэ-ама ыла олоробун. Бу барыта үөрэтэр кииммин арыйарбар, лиссиэнсийэни ыларбар көмөлөспүтэ. Резидент буоламмын, элбэх харчыны бараабакка, биисинэспин сайыннарар кыахтанным. «Мин биисинэһим» уонна биисинэс-инкубатор үлэһиттэрэ иһитиннэриилэри оҥоро, сүбэни-аманы биэрэ олорор буоланнар, барытын кэмигэр билэн-көрөн иһэрбитигэр наһаа көмөлөөх. Маннык өйөбүлэ суох, миэхэ уустук буолуо этэ дии саныыбын», — диэн Екатерина Морозова санаатын үллэстэр.
Сэҥээрэр ыйытыыларгытыгар хоруйдары ылыаххытын, судаарыстыба өйөбүлүн туһунан иһитиннэриилэри билэ-көрө олоруоххутун, биисинэс-компетенцияларга үөрэниэххитин баҕарар буоллаххытына үлэ кыраапыгын хайаан да көрүнэр, үлэлиир сиртэн тахсан ханна эрэ барар наадата суох. Бары наадалаах иһитиннэриини Саха сирин дьоҕус уонна орто предпринимательствотын порталыгар Portal.b14.ru киирэн көрүөххүтүн сөп.
+1
+1
+1
+1
+1
+1
+1